Shan Plateau ရှမ်းဘောင်းဘီ
ကျွန်တော်တို့ ပြည်ပနိုင်ငံရေးကာလအတွင်မှာ သူနဲ့ တရားဝင်ဆွေးနွေးဘူးတယ်။ သူက ရှမ်းတောင်ပိုင်းအဖွဲ့ခေါင်းဆောင်။ ဗိုလ်မှူးကြီးလို့ ခေါ်ကြတယ်။ ကျွန်တော်တို့က NCGUB ကို ကိုယ်စားပြုပြီး ဆွေးနွေးတယ်။ NCGUB အမျိုးသားညွန့်ပေါင်းအစိုးရအဖွဲ့ကို တိုးချဲ့ဖွဲ့စည်းရေးကိစ္စ။ တိုင်းရင်းသား အဖွဲ့အားလုံးနဲ့ လိုက်ဆွေးနွေးကြတာ။
ရွက်ဆစ်နဲ့ ထိုင်းနိုင်ငံ မြို့တမြို့မှာ သူတို့အဖွဲ့က စီစဉ်တဲ့နေရာတခုမှာ။ ကျွန်တော်တို့ အစိုးရအဖွဲ့ထဲက ကျွန်တော်နဲ့အတူ တခြားဝန်ကြီး ၂ ဦးလည်းပါတယ်။ တဦးက ပအို့ဝ်။ ဘွဲ့ပူပူနွေးနွေးရတဲ့ ပအို့ဝ် မဟုတ်ပါ။ ကိုယ့်လူ ပအို့ဝ်က သူ့တိုင်းရင်းသားဝတ်စုံနဲ့ လာတယ်။ ကိုယ့်လူမျိုးစုကို ဂုဏ်တင်တာ ကောင်းတယ်။ ခက်တော့လည်း ခက်ပြန်ရော။ ရွက်ဆစ်က ရှမ်း။ တချို့ရှမ်းတွေကို ရှမ်းလူမျိုးကြီးဝါဒစွဲကိုင်တယ်လို့ ဝေဘန်ကြတာတွေလည်းရှိတယ်။ ရှမ်းပြည်နယ်က လူမျိုးစုငယ်တွေနဲ့ တယ်အစီးမကပ်လှပါ။ ကျွန်တော်တို့ ရွှေဗမာတွေရဲ့ ဗမာလူကြီးဝါဒကိုတော့ ရာစုနှစ်တဝက်ကျော် ပြောနေခဲ့ကြတာ။
ရှမ်းစကားသာ ပြောလိုတဲ့ ရှမ်းခေါင်းဆောင်ကို သူ့လက်ထောက်တဦးက ဗမာဘာသာပြန်လုပ်ပေးရတယ်။ ဘာသာပြန်ပေးသူက ဒီပလိုမက်တစ် ဖြစ်တယ်။ ကျေးဇူး။
ဘာသာစကားကလည်း အဟန့်အတား အတော်ကြီးမားတာ။ ကျွန်တော် နယူးဒေလီကိုရောက်စက ချင်းအမျိုးသားနေ့ကို ဖိတ်လို့ တက်ရတယ်။ အဲဒါက အိန္ဒိယမှာ ပဌမဆုံးကျင်းပတဲ့ ချင်းအမျိုးသားနေ့ထင်တယ်။ အခန်းအနားမှာ ဗမာစကား ပြောခွင့်မပြုပါ။ ပင်နီတိုက်ပုံ ဝတ်မလာရလို့တော့ မရှိ။ ကျွန်တော်လည်း ဘောင်းဘီရှည်နဲ့ တက်တာ။
ရွက်ဆစ်နဲ့ တွေ့ဆုံပွဲ အချုပ်ကတော့ အစိုးရအဖွဲ့ထဲ အခုမပါလိုသေးပါတဲ့။
တိုင်းရင်းသားအရေးက အင်မတန်ကျယ်ပြီး အလွန်တရာ သတိကြီးရတယ်။ ဆယ်စုနှစ်တွေကြာအောင် အချိန်ယူနေတာ တိုးတက်လာတာတွေရှိတယ်။ ကျွန်တော်တို့နဲ့ ပိုပြီး နီးကပ်လာသူတွေရှိသလို ဟိုဘက်နဲ့ ပိုအဆင်ပြေသူတွေလည်း မျက်ဝါးထင်ထင်။ ဘက်ပြောင်းလဲမှုတွေကလည်း အတိုင်းသား မြင်နိုင်ကြပါတယ်။
လက်နက်နဲ့ လက်နက်ကြားမှာ စကားပြန်မလို။ ယူနီဖေါင်းနဲ့ ယူနီဖေါင်း တည့်တယ်။ ကျွန်တော်က ဆေးကျောင်းမှာ ရှမ်းဘောင်းဘီဝတ်တဲ့ သူငယ်ချင်းတွေနဲ့ တည့်တယ်။
ဒေါက်တာတင့်ဆွေ
Comments
Post a Comment