Stroke ဦးနှောက်သွေးကြော မတော်တဆဖြစ်ခြင်း

Stroke စထုပ်ခ်
(ဒီစာကို ရေးထားတာ ၁၀ နှစ်ကျော်ပြီ။ ပြန်တွေ့တော့ ပြင်စရာတွေပါနေတယ်။ ဆောရီး။ ပြင်လိုက်ပါတယ်။ ပြင်စရာကျန်ဦးမလားလည်း မသိ။)
ကျွန်တော် အသက် ၂၉ အမျိုးသားပါ ကိုယ်အလေးချိန် ပေါင် ၁၃၀ ပါဆရာ အဲယားကွန်းအခန်းထဲမှာ
အလုပ်လုပ်ကြာချိန် တရက် ၉နာရီခွဲလောက် Control ခန်းမှာအလုပ်လုပ်ရပါတယ်ဆရာ ဒီရက်ပိုင်း ခြေထောက်တွေ လက်တွေက ရုတ်တရက် ထလိုက်ရင် အကြောတွေ တင်းနေပြီး ချက်ချင်းလမ်းလျှောက်လို့မရဘူးဆရာ ဘယ်လိုနည်းလမ်းနဲ့ နေထိုင်ရမလဲဆရာ လေဖြတ်နိုင်တဲ့လက္ခဏာတွေကို ပြောပြပေးပါဆရာ
Stroke စထုပ်ခ်လို့ လူသိများတဲ့ ဦးနှောက်သွေးကြောရောဂါကို Cerebrovascular accident (CVA); Cerebral infarction; Cerebral hemorrhage; Ischemic stroke စသဖြင့် ခေါ်သေးတယ်။ Brain attack လို့လဲ ခေါ်တယ်။ မြန်မာတွေက လေဖြတ်တာလို့ ခေါ်ကြတယ်။
ရောဂါဖြစ်နိုင်ခြေရှိသူတွေကတော့ -
• သွေးတိုးရောဂါ၊
• Atrial fibrillation နှလုံးခုန်မမှန်တာ၊
• ဆီးချို၊
• မိသားစုထဲမှာ အဲလိုဖြစ်သူရှိတာ၊
• (ကိုလက်စထော) များနေတာ၊
• အသက်ကြီးလာတာ၊ ၅၅ နှစ်ကျော်တာ၊
• အသားမည်းဖြစ်တာ၊
• နှလုံးရောဂါလဲရှိနေမယ်၊ ခြေထောက်ပိုင်းကို သွေးကြောတွေက ကျဉ်းလို့ သွေးလျှောက်တာလဲ နှေးမယ်ဆိုရင်၊
• လူအဝလွန်သူတွေ၊
• အရက်သေစာ အသောက်များသူတွေ၊
• အငန် နဲ့ အဆီစား များသူတွေ၊
• ဆေးလိပ် သောက်သူတွေ၊
• (ကိုကိန်း) နဲ့ တားမြစ်တားတဲ့ဆေးတွေကို သုံးသူတွေ၊
• အသက် ၃၅ နှစ်ကျော်ပြီး ကိုယ်ဝန်တားဆေး သုံးသူအမျိုးသမီးတွေလဲ ဖြစ်နိုင်တယ်။
ဘယ်လိုခံစားရမလဲ
ဦးနှောက်ရဲ့ ဘယ်နေရာမှာ ဖြစ်သလဲအပေါ် မူတည်တယ်။ တချို့မှာ ဖြစ်တာမသိဘဲ နေတတ်တယ်။ ဖြစ်တာက ရုတ်တရက်ဘဲ။ ဖြစ်စ ၁ ရက် ၂ ရက်မှာ ဖြစ်လိုက် ပေါ်လိုက်လဲ ဖြစ်နိုင်တယ်။ ပဌမဆုံး အကြိမ်က ခံစားရတာ အပြင်းထန်ဆုံးဘဲ။ ဒါပေမဲ့နောက်ဖြစ်ရင် ဆိုးဆိုးလာတော့မယ်။
• ခေါင်းကိုက်မယ်။ ရုတ်တရက်ဖြစ်မယ်။ ပက်လက်လှဲချိန် ဖြစ်တယ်။ အိပ်ရာကနေ နိုးလာမယ်။ အနေအထား ပြောင်းတာနဲ့ ပိုဆိုးမယ်။
• ခေါင်းမူးနေမယ်၊ အိပ်ချင်နေမယ်၊ သတိမကောင်းဖြစ်မယ်၊ သတိလစ်မယ်၊ နားကောင်းကောင်း မကြားဖြစ်မယ်၊ အရသာ မကောင်း ဖြစ်မယ်၊ စိတ်ရှုပ်ထွေးနေမယ်၊
• နာတာ-ထိတာ-ဖိတာကို ခံစားမှု၊ အပူ-အအေးသိတာ အရင်လိုမဟုတ်ဖြစ်မယ်၊
• အမျိုရခက်မယ်၊ စာအရေးရ အဖတ်ရခက်မယ်၊ ဆီး-ဝမ်းအသွားရ အထိန်းရခက်မယ်၊ ကိုယ်ကို ထိန်းမတ်လို့ မရဖြစ်မယ်၊ အပြန်အလှန်ထိန်းညှိ မကောင်းဖြစ်မယ်၊
• မျက်နှာ-ခြေ-လက် ကြွက်သားတွေ အားနည်းမယ် (တဘက်ထဲဖြစ်တာ များတယ်)၊ ထုံ-ကျင်နေမယ် (တဘက်ထဲဖြစ်တာ များတယ်)၊ ကိုယ်ကို မထိန်းနိုင်တာ၊ လမ်းမလျှောက်နိုင်ဖြစ်မယ်။ ကိုယ်တခြမ်း လေဖြတ်တယ်လို့ ခေါ်တယ်။
• စိတ်လှုပ်ရှားမှု-စိတ်ပုံစံ ပြောင်းမယ်၊ စကားပြောရခက်မယ်၊ သူများပြောတာကို နားမလည်ဖြစ်မယ်၊
• မျက်ခွံအောက်ကျနေမယ်၊ မျက်စိကို လှုပ်မရဘူး၊ သူငယ်အိမ်ဟာ အလင်းရောင်ကို တုန့်ပြန်တာ နှေးမယ်၊ မျက်စိ အကြည့်ရခက်မယ်၊
• နှလုံးခုန်-အသက်ရှူ မမှန်တာ၊
• ခေါင်းကို တဖက်ဖက်ကို ကောင်းကောင်းလှည့်မရတာ၊
• လျှာကိုကောင်းကောင်း အသုံးမချနိုင်ဘူး၊
• မှတ်ဉာဏ်နည်းမယ်။
ဒေါက်တာတင့်ဆွေ