Hormones in Meat and Dairy အသားတွေထဲပါနေတဲ့ ဟော်မုန်းဆေး

မေးခွန်းကို ဖုန်းကနေဖတ်စဉ်ကတွေ့ပြီး ဖြေမလို့ ကွန်ပြူတာမှာရှာတာ ခုထိမတွေ့သေးပါ။ ကြက်သားတွေဝယ်တာ စိတ်မချရလို့ ဘယ်ဟာဝယ်ရမလဲ မေးတာ။

၁၃-၂-၂၀၁၆ နေ့့ မေးလို့ Chicken Wings ကြက်တောင်ပံစာရေးထားတယ်။ အမျိုးသမီးတို့အတွက် ထိတ်လန့်ဖွယ် ကြက်တောင်ပံဆိုတဲ့သတိပေးစာမျိုးတွေကိုလည်း ဖတ်ရပါတယ်။ ကြက်တွေကို ကြီးထွားမှု ပုံမှန်ထက်ပိုစေအောင် Steroids စတီရွိုက်ဆေးထိုးကြပါတယ်။ စတီရွိုက်ဆိုတာ ဟော်မုန်းတမျိုးဖြစ်တယ်။ စတီရွိုက်တွေကိုယ်ထဲရောက်ရင် ကိုယ်ထဲမှာရှိနေတဲ့ ဟော်မုန်းတွေ အချိုးအဆ မမှန်ဖြစ်စေမယ်။ အထူးသဖြင့် အမျိုးသမီးဟော်မုန်း ပိုကဲလာနိုင်တယ်။ ယောက်ျားတွေမှာလည်း မ-ဟော်မုန်းရှိနေတာပါ။

ထိုင်းနိုင်ငံမှာ ကြက်ဖင်စီဘူးစားလို့ ယောက်ျားတွေ ရင်သားထွက်တယ်လို့လည်း ပြောကြတယ်။ စတီရွိုက်ကြောင့် ကိုယ်အလေးချိန် တိုးနိုင်ပါတယ်။ ယူအက်စ်၊ ကနေဒါနဲ့ ဥရောပမှာ ကြက်၊ ဘဲ၊ ဝက်၊ ကြက်ဆင်တွေကို စတီရွိုက် မထိုးဘို့ တားမြစ်ထားပါတယ်။ ကြက်ခြံတိုင်းမှာတော့ မထိုးလောက်ပါ။ အများထင်ကြသလို စတီရွိုက်ထိုးဦးတော့ ကြက်တောင်ပံမှာလာစုတယ်ဆိုတာ မမှန်ပါ။ 

သတိပေးတာတွေက မ-ဟော်မုန်းများသူတွေမှာ သားအိမ်အကျိတ်၊ မျိုးဥအိမ်အကျိတ်ဖြစ်နိုင်ခြေ ပိုများစေတယ်လို့ ဆိုပါတယ်။ သားအိမ်ကင်ဆာ၊ ရင်သားကင်ဆာအထိတော့ သတိပေးတာမရှိပါ။ တခြားဖြစ်နိုင်ခြေရောဂါတွေကိုလည်း သုတေသနတွေ မပြည့်စုံသေးပါ။

အမေရိကန် FDA က စားသုံးတဲ့အသားတွေမှာ steroid hormone စတီရွိုက်ဟော်မုန်းသုံးတာကို ခွင့်ပြုခဲ့တယ်။ Steroid Hormone Implants လို့ခေါ်တယ်။ ကနေ့ ယူအက်စ်အေမှာ သုံးနေတဲ့ စတီရွိုက် ၆ မျိုးရှိတယ်။ estradiol, testosterone, and progesterone သဘာဝစတီရွိုက်တွေနဲ့  estrogen compound zeranol, androgen trenbolone acetate, progestin melengestrol acetate ခေါ်ဓါတ်ခွဲခန်းထုတ် ဟော်မုန်းတွေဖြစ်တယ်။

အဲဒီနောက်မှာ ကျန်းမာရေးသတိပေးစာတွေလည်းမကြာခဏရေးကြတယ်။ ၁၉၇၄ မှာစသုံးခဲ့တဲ့ အမဲသားမှာသုံးတဲ့ DES (diethylstilbestrol) ဆေးနဲ့ဆိုင်တာတွေလည်းပါတယ်။ အဲလိုဟော်မုန်းတွေများရင် လူ့ကိုယ်မှာ အပြောင်းအလဲတွေ ဖြစ်စေနိုင်တယ်။ Antibiotics ခေါ်ပဋိဗီဝဆေးတွေ သုံးတာကနေလည်း လူ့ကိုယ်ထဲရောက်တယ်။ 

လူမှုရေးကွန်ရက်တွေမှာ ကျန်းမာရေးသတိပေးချက်တွေ ခဏခဏတွေ့ရပါတယ်။ သတိပေးတာတော့ ကောင်းပါတယ်။ ဖတ်ကြည့်ရင် အချက်အလက်မစုံပါ။ ဘာကြောင့် ဘာဖြစ်မယ်ပြောတာလည်း မရေရာပါ။ မီဒီယာသမားတွေနဲ့ မီဒီယာအတုတွေကနေ လူတွေကိုဖြဲခြောက်ပြီး စာဖတ်သူများအောင်လုပ်တာ မသင့်လျှော်ပါ။ အချက်အလက် မှန်တာကိုသာ ရေးသင့်ကြပါတယ်။ ကျွန်တော်ကတော့ ဘယ်ဆိုင်က ဘယ်လိုအသားက ကောင်းတယ် မကောင်းဘူး မရေးနိုင်ပါ။ သုတေသနတွေ လိုတယ်။ သတိထားတာ မမှားပါ။

ဒေါက်တာတင့်ဆွေ

၁၂-၆-၂၀၁၉