အလေးထားမှု မတူကြပါ

နေမကောင်းလို့မေးတာတွေကို ဖြေနေတာ ၁၀ နှစ်ကျော်ပြီ။ မေးခွန်းပေါင်းလည်း ထောင်သောင်းရတယ်။ ဆေးပညာစာတွေကို အေ-ဘီ-စီ စီကာစဉ်ကာ မရေးပါ။ မေးလာတဲ့ခေါင်းစဉ်အရသာ ရေးပါတယ်။

စာတွေရေးထားပြီးသား များလှပြီ။ စာအုပ် ၃ အုပ်ထုတ်ထားတယ်။ ထပ်ထုတ်စရာက ၅ အုပ်စာလောက်ရှိမယ်။ မေးခွန်းတွေလာရင် ရေးပြီးသားတွေက အဆင်သင့်။ တချို့မေးခွန်းတွေကိုတော့ စာအသစ်ရေးရတယ်။

စာအသစ်ရေးတယ်ဆိုတာ လက်တန်းရေးရတာမျိုး မဟုတ်ပါ။

၁။ မေးခွန်း စာလုံးပေါင်းသတ်ပုံ မှန်အောင် အရင်ပြင်ဖတ်ရတယ်။ မှန်အောင် ရေးတတ်သူက ၁၀% ထက် နည်းတယ်။

၂။ ရောဂါအကြောင်း လိုက်ရှာရတယ်။ ရှာတတ်ရမယ်။ တွေ့ကရာ သုံးမရ။

၃။ ဘာသာပြန်ရတယ်။

၄။ မြန်မာပြည်သူပြည်သားတွေနဲ့ ကိုက်ညီမှာကိုသာ ရွေးပြီး တည်းဖြတ်ရတယ်။

၅။ ကိုယ်ပိုင်အတွေ့အကြုံလေးလည်း ရှိရင် ထည့်ရေးရသေးတာ။

ဖြေလိုက်ပြီ -

၁။ စာကို ဖတ် မဖတ် မသိရ။

၂။ ရောဂါ သက်သာ ကောင်းဆို လည်းပြန်မသိရ။

၃။ အဖြေစာကို လက်ခံရကြောင်း ပြန်စာ ၅% လောက်ဆီကသာ ရတယ်။

၄။ မေးတုန်းကတော့ ဖုတ်ပူမီးတိုက်။ ပြန်စာကို လတွေ နှစ်တွေကြာမှ ရတာမျိုးလည်း ရှိသေးတာ။

လူတွေဟာ အလေးထားမှုမှာ အတော် မတူကြပါ -

၁။ ဆရာဝန် ခေါင်းပူနေချိန်မှာ ဝေဒနာရှင်က ခပ်အေးအေးသမားလည်း ရှိတတ်တယ်။ 

၂။ ရောဂါက သာမန်ကာရှန်ကာ၊ အဲဒါကို အဖြစ်သည်းသူတွေလည်း တကယ်ရှိတာ။ 

၃။ ဘယ်လိုဖြစ်နေနေ နေမကောင်းရင် မေးနိုင်ကြပါတယ်။

၄။ သတ်ပုံမမှန်လို့ မဖြေတာ အခုထိတော့ တခုတလေမျှ မရှိပါ။

၅။ စာမှန်အောင် မရေးသူတွေကို ကျေးဇူးတင်တယ်။ ဘာတွေကို ဘယ်လိုမှားနေကြကြောင်း သက်သေခံနဲ့ပါ သိရတယ်။

ဒေါက်တာတင့်ဆွေ