Breakfast ဘရိတ်ဖတ်စ် နံနက်စာ

ကျန်းမာရေးနဲ့ညီညွတ်တဲ့ မနက်စာကို ဘယ်လိုလေးတွေ ပြင်ဆင်စားသောက်ကျ(ကြ)လဲရှင် အမေ့အတွက်လုပ်ပေးချင်လို့ပါ အပြင်စာတွေစားနေရတာကြည့်ပြီး စိတ်မချမ်းသာဖြစ်နေရလို့ပါ

ဆရာဝန်ကို မေးတာ မဟုတ်ပါ။ ဆရာဝန်လည်း မနက်စာ စားပါတယ်။ မေးတဲ့သူဆီ တိုက်ရိုက် ဖြေမရလို့ ပို့စ် တင်လိုက်မယ်။ ရေးပြီးသား စာ ၃ ပုဒ်ကို ပေါင်းလိုက်မယ်။ 

(၁) မနက်စာကို ဒါတွေလုံးဝမစားပါနဲ့ဆိုတာတခု တွေ့တယ်။ မြန်မာပြည်တွင်း၌ နေထိုင်သူများ 

(က) မစားသင့်သော နံနက်စာများ

၁။ ပြင်သစ်နိုင်ငံ၊ ပဲရစ်ဟော်တယ်မှ တိုက်ရိုက်မှာယူသော အစားအစာများ

၂။ အမေရိကားကနေ ဒီအိတ်ချ်အယ်လ်နဲ့ မှာယူသည့် ကေအက်ဖ်စီ ကြက်ကြော်။

၃။ မြောက်ဝင်ရိုးစွန်းနားက ဖမ်းရသည့် sculpins, snailfishes, eelpouts, and cods ငါးများ။

(ခ) စားသုံးသင့်သည့် ဘရိတ်ဖတ်စ်

ထမင်းကြမ်းကြော်၊ ပဲပြုတ်၊ အကြော်၊ မုံ့ပေါင်း၊ မုံ့ဟင်းခါး၊ မုံ့တီ၊ အီကြာတွေး၊ နံပြား၊ လက်ဖက်ရည်၊ ကော်ဖီ၊ ဆီချက်ခေါက်ဆွဲ၊ ကောက်ညှင်းပေါင်း၊ စမူဆာ စသည်။

(၂)

မင်္ဂလာပါ ဆရာ မနက်စောစော စာ breakfast မစားပဲ နေတဲ့အကျင့်က ရောဂါတခုခု၊ ဆိုးကျိုးတခုခုများ ဖြစ်နိုင်ပါသလား ဆရာ

အစားအသောက်နဲ့ဆိုင်တဲ့ မေးခွန်းတွေ အမျိုးမျိုးကို မကြာခဏဖြေရတယ်။ မေးခွန်းမဟုတ်ဘဲ တင်ထားကြတဲ့ စာတွေက အမြီးအမောက်မတည့်တာတွေ့ရင်လည်း ရေးပါတယ်။ ကျန်းမာရေးနဲ့ ညီညွတ်တဲ့အစားအစာတွေ၊ ကင်ဆာအတွက်အစားအစာတွေ၊ သွေးတိုး၊ ဆီးချို စတဲ့ ရောဂါတခုစီအတွက် အစားအသောက်တွေလည်း ရေးထားပြီးပြီ။ ထမင်းဟင်းအကြောင်းသာမက သောက်စရာတွေအကြောင်းလည်း ရေးတယ်။ ထူးဆန်းတဲ့အမည်တွေပေးပြီး ရောဂါကြီးကြီးမားမားတွေ ပျောက်စေလို့ရေးတာမျိုးတွေ မမှန်ကြောင်းလည်း ရေးတယ်။ 

ဆေးပညာစာတွေရေးစက အာဟာရအကြောင်းရေးတာမှာ အမေရိကန်ဆရာဝန်တဦးရေးတဲ့ လူအများ ထင်မှတ်မှားတဲ့ စားပါ-ရှောင်ပါဆိုတာတွေ မမှန်ကြောင်းကို ဘာသာပြန်တင်တယ်။ တယောက်ကနေ ထောက်ပြတယ်။ စာဖတ်သူတချို့က ဖတ်ရသမျှ၊ မြင်ရသမျှ အဟုတ်ယူကြလို့ လမ်းလွဲယူမှာစိုးရိမ်ပါသတဲ့။ တင်ပြချက်က ကျိုးကြောင်းဆီလျှော်ပေမဲ့ စာဖတ်သူက ရေချိန်နိမ့်ရင် တလွဲယူဆနိုင်တာမျိုးက ဘာသာရပ်တိုင်းမှာ ရှိတယ်။

အခြေခံကို မလွတ်ရပါ။

• လူတွေသည် အစုံစားသတ္တဝါဖြစ်၏။ အသား-ငါး-ပဲ-ဥ-အသီးအရွက်စား၏။ လူတွေသည် တနေ့ အနည်းဆုံး ၂ နပ်စားကြ၏။ တချို့ ၃ နပ်။ တချို့ ၄ နပ်စား။

• ဗုဒ္ဓဘာသာမှာ ဥပုသ်စောင့်တာရှိ၏။ နေ့လွှဲညစာ မစားရ။ အစ္စလာမ်မှာလည်း ရှောင်ရတဲ့ရက်မျိုးရှိ၏။ ဟိန္ဒူတွေက အသားမစားကြ။ ခရစ်ယန်ဂိုဏ်းတခုက စည်းကမ်းတွေများ၏။

• လူတိုင်း ငယ်စဉ်ကစားတာ စားနည်းကနေ ပြောင်းလဲစားသောက်လာလေ့ရှိ၏။ ကျန်းမာရေးအရ ဆရာဝန်က စားစေ၊ ရှောင်စေကို လိုက်နာရသူတွေလည်း မနည်းမနောရှိ၏။ မလိုက်နာနိုင်သူကလည်း များ၏။ အထင်နဲ့ စားနေတာတွေ၊ အဟုတ်မှတ်ပြီး ရှောင်နေတာတွေလည်း အတော်ကိုများ၏။

• လူတို့၏အစာလမ်းကနေ စာချေအရည်ထွက်နေသည်။ ထို့ကြောင့် အစားအသောက်ကနေ အာဟာရရကြပြီး အင်နာဂျီ ခေါ် အားနှင့် အပူဓါတ်ရစေသည်။

• အစားအသောက်ဟူသည် အကျင့်ဖြစ်စေသည်။ စားနေကျနေသည်ကိုသာ စားလိုလေ့ရှိသည်။ အစားအမျိုးအစား ပြောင်းလျှင် အခက်အခဲဖြစ်စေသည်။ သို့သော် ကျင့်ယူသလိုမျိုးလုပ်က ရနိုင်၏။

• အစာခြေစနစ်ကလည်း စားနေကျအစားအစာနဲ့ စားသောက်ချိန်အရ လိုက်လျှောညီထွေ လုပ်ပေးနေသည်။ ထို့ကြောင့် တနေ့ ထမင်း ၂ နပ်သာစားသူက ၄ နပ်စားသောက် ခက်မည်ဖြစ်ပြီး၊ ၄ နပ်စာနေသူ ဥပုသ်စောင့်သော် ခက်စေမည်ဖြစ်သည်။ 

• တသက်လုံး ဗမာစာတွေစားလာခဲ့သူ တခြားတိုင်းပြည်ရောက်လို့ ရတာရှိတာကိုစားရသော် အစမှာ ခက်ခဲမည်။ သို့သော် အဆင်ပြေအောင် ခန္ဓာကိုယ်စနစ်တွေက ပြုပြင်ပေးလာနိုင်ပေသည်။ အချိန်ယူရတတ်၏။ ရင်ဆိုင်ကျော်လွှားရတတ်ပါသည်။

• လူ့စိတ်သည် အလိုလိုက်၏။ သို့သော် စိတ်ခိုင်မာသူတွေလည်း ရှိ၏။ လူ့အသိပညာနှင့် ဆင်ခြင်တွေးခေါ်မှုသည် နုရာမှ ရင့်လာသည်။ သို့သော် တလွဲတွေ အဆန်းတွေကို ခုံမင်နှစ်သက် အထင်ကြီး လိုက်နာသူမျိုးလည်း မရှား များပြားပါသည်။

• လူ့ခန္ဓာကိုယ်ကြီးသည် အကောင်းဆုံးကွန်ပြူတာထက် သာသည့်နေရာတွေ ရှိပါသည်။ သို့သော် မှန်ကန်စွာ အသုံးချတတ်ရပါမည်။

မနက်အိပ်ရာထဖြစ်လို့ ကော်ဖီသောက်ရင်း စားရေးခြင်းဖြစ်ပါသည်။ ဘရိတ်ဖတ်စ် ခေါ် စားစရာ တခါတခါတော့ စားဖြစ်သည်။ မနေ့က ကြက်ဥကြော်တလုံး လာချလို့ မေးခွန်းတွေဖြေရင်း စားဖြစ်သည်။ အေးနေပြီ။ ဟိုတနေ့က ဘရိတ်ဖတ်ကို လက်မအား အချိန်မအားလို့ မစားခဲ့ရ။ တခါတခါ မေးခွန်းတွေကို ခဏစောင့်စေပြီး ကောက်ညှင်းပေါင်းနဲ့ ငါးခြောက်ကို တပန်းကန် ကုန်အောင်စားပါသည်။ တခါတခါ လက်ဖက်ရည်ဆိုင်သွားပြီး ပူရီ သို့မဟုတ် အီကြာကွေး စားသောက်ပါသည်။ ပွဲကြီးကို မှာလေ့မရှိပါ။ 

ကျွန်ုပ်၏အစာအိမ်သည် အစားအစာမျိုးစုံနဲ့ ရင်းနှီးကျွမ်းဝင်ပါသည်။ ၂၇ ခုနစ်နှစ်ခွဲကြာ ခွဲခွါခဲ့ရတဲ့ ကိုယ့်တိုင်းပြည်ကို အလည်ပြန်တော့ ရန်ကုန်စာ၊ မန္တလေးစာ၊ အညာစာတွေ ကျွေးသမျှစားပါသည်။ အစာအိမ်က မမေ့ပါ။ (ကန်တော့) ခရီးသွားသူဝမ်းပျက်ခြင်းတော့ တကြိမ်ဖြစ်ခဲ့ပါသည်။ 

(၃) Cereal မနက်စာ

ကျွန်တော်က ဆီရီရယ်လို့ရေးတယ်။ သူများက စီရီရယ်တဲ့။ စ နဲ့ ဆ မှားကြတာ၊ စူ နဲ့ ဆူ လွဲကြတာ အတော်များတယ်။ ကင်စာ မှားတယ်။ ကင်ဆာ။ အာထွာစောင်း မှားတယ်။ အာထွာဆောင်း။ စူပါ မှားတယ်။ ဆူပါ။

မြန်မာပြည်က မနက်စာနဲ့ တခြားတိုင်းပြည်တွေမှာ မတူပါ။ မြန်မာပြည်မှာ မုံ့ဟင်ခါး၊ လက်ဖက်ရည်နဲ့ အီကြာကွေး၊ ပူရီ၊ နံပြား စသဖြင့်စားကြတယ်။ ကျွန်တော်တို့ ငယ်စဉ်ကတော့ ထမင်းကြမ်းကြော်။

တရုပ်စာတော့ ခေါက်ဆွဲ။ အိန္ဒိယမှာ ဂျုံနဲ့လုပ်တာစားကြတယ်။ အိုးကင်းပူမှာကင်တာကို ရိုတီးလို့ ခေါ်တယ်။ ဆီနဲ့ကြော်တာကို ပူရီခေါ်တယ်။ အဲဒီ ဂျုံနဲ့လုပ်ထားတာကို ပဲ ဒါမှမဟုတ် အားလူးနဲ့စားကြတယ်။ အမေရိကန် ဘရိတ်ဖတ်စ်မှာ ပေါင်မုန့်နဲ့ ကြက်ဥကြော်။ ဝက်အူတောင့် ဒါမှမဟုတ် ဝက်ပေါင်ခြောက် ခေါ် ဘေကွန်ပါတယ်။ ပေါင်မုန့်ကို ထောပတ်သုတ်မယ်။ အဲတာက ကိုလက်စထောများလို့ နှလုံးရောဂါရှိသူတွေနဲ့ သွေးကြောကျဉ်းသူတွေနဲ့ မသင့်ပါ။

ရေးခဲ့တဲ့ မနက်စာတွေကို ပြုပြင်ရတာ လက်ဝင်တယ်။ ခုခေတ်က အလွယ်လမ်းလိုက်လာကြရတယ်။ အချိန်နည်းကြလို့ပါ။ လွယ်လည်းလွယ်ပြီး ကျန်းမာရေးနဲ့ပါ ညီညွတ်တာကိုသာ ညွှန်ပါမယ်။ တခုကတော့ ဆီရီရယ် မနက်စာဖြစ်ပါတယ်။

အတော်များများ တိုင်းပြည်တွေမှာ ဘရိတ်ဖတ်စ်အဖြစ် ဆီရီရယ်ကို စားသုံးကြတယ်။ ဟော်တယ်တွေမှာလည်း ဆီရီရယ်။ စာသင်ကျောင်းတွေမှာလည်း ဆီရီရယ်။ ကိုယ်ဝန်ဆောင်နဲ့ နို့တိုက်မိခင်တွေကို ဝေလည်းဝေတယ်၊ ဆီရီရယ်။ 

ဆီရီရယ်ဆိုတာ လူတွေစားသုံးနိုင်တဲ့ ကောက်နှံတွေကိုခေါ်တယ်။ ရုက္ခဗေဒလို အင်ဒိုစပမ်၊ ဂျမ်နဲ့ ဘရန်တွေပါတဲ့ အစေ့အဆံတွေ ဖြစ်ပါတယ်။ ဆန်၊ ဂျုံ၊ ပြောင်းဖူး၊ အနှံစားပြောင်း၊ လူး၊ ဘာလီ၊ ဆပ်တွေကို စားကြတယ်။ ဆီရီရယ်မှာ အဲတာတမျိုးမျိုးကနေ လုပ်ထားတယ်။ အဖတ်လေးတွေမျိုးစုံ။ အနှံတခုလုံးနဲ့လုပ်ထားမှသာ ဆီရီရယ်ခေါ်တယ်။ တခုလုံးဆိုတာ ဖြူဖွေးနေအောင် ချွတ်မထားတာ။

ဆီရီရယ်ထဲမှာ ဗီတာမင်တွေ + ဓါတ်ဆားတွေ + ကာဗွန်ဟိုက်ဒရိတ် ခေါ် ကစီဓါတ် + အဆီနဲ့ဆီ + ပရိုတင်းဓါတ်တွေ အစုံပါတယ်။ ကောင်းတယ်။ ကျွန်တော်တို့ အစဉ်အလာစားသုံးတာတွေက ဖြူဖွေးနေအောင်ချွတ်ထားလို့ အင်ဒိုစပမ်သာ ကျန်ပြီး၊ အပြင်က ဂျမ်နဲ့ ဘရန် ခေါ် ဖွဲနုမကျန်တော့လို့ အာဟာရအစုံမရတော့ပါ။ အဲတော့ သွားနိုင်၊ လာနိုင်၊ ပြေးနိုင်လွှားနိုင်ရုံသာ ရမယ်။ ဗီတာမင်တွေ မစုံတော့။ ခုခံအားနဲ့ အနာကျက်ဖို့ အားနည်းမယ်။

ဘရိတ်ဖတ်စ် ဆီရီရယ်ထဲမှာ အာဟာရတန်ဖိုးတွေကစုံပါတယ်။ ဆီရီရယ် (၈၁) ဂရမ်တခွက်ကနေ ကလိုရီ ၃ဝ၇ ရမယ်။ ပြည့်ဝဆီ၊ ပေါ်လီမပြည့်ဝဆီ၊ မိုနိုမပြည့်ဝဆီ၊ ဆိုဒီယမ်ဆား၊ ပိုတက်ဆီယမ်၊ ကာဗွန်ဟိုက်ဒရိတ်၊ ဖိုက်ဘာ၊ သကြား နဲ့ ပရိုတင်းဓါတ်တွေရမယ်။ ကယ်လ်စီယမ်၊ သံဓါတ်၊ ဗီတာမင် ဘီ-၆ နဲ့ မက်ဂနီဆီယမ်တွေလည်းရမယ်။ ကိုလက်စထော ခေါ် အဆီဓါတ်မရတာ ကျန်းမာရေးအတွက်ကောင်းတယ်။

မြန်မာနိုင်ငံမှာ စီးတီးမတ်နဲ့ တခြား ဆူပါမားကက်တွေမှာ ဆီရီရယ်ကိုတွေ့ရတယ်။ ဆီရီရယ်မနက်စာကို ပြုပြင်စီမံရတာ လက်မဝင်ပါ။ ကျွန်တော်တို့လူမျိုးတွေ အလွန်ကြောက်တဲ့ ညှော်လည်းမနံပါ။ ဆီရီရယ်နဲ့ နွားနို့ ရောလိုက်ရင်ပြီးရော။

လူတိုင်းမှာ အရသာအကြိုက်ကိုယ်စီရှိကြတယ်။ စားနေကျကိုသာ ခုံမင်ကြတယ်။ ကျန်းမာရေးအတွက်သင့်မှန်တာကို ကြိုက်ယူရတယ်။ ဆီရီရယ်ကို ကြိုက်ယူနိုင်ရင် အဟာဟာရလည်းရမယ်။ အစမှာ ခံတွင်းမတွေ့သေးဖြစ်တတ်တယ်။ အချိန်လည်းရမယ်။ ခေတ်မီတယ်လို့ပါ အပြောခံရမယ်။ Smile!

How to Pronounce Cereal https://www.youtube.com/watch?v=IAwU0SJpVRA

ဒေါက်တာတင့်ဆွေ