The Blind Man ဆရာဝန်ကို ဘယ်လိုနာမ်စားနဲ့ ပြောသင့်သလဲ
.jpeg)
ဟုတ်။ ဒေသအလိုက်၊ လူမျိုးအလိုက်၊ တိုင်းပြည်အလိုက်အခေါ်တွေအကြောင်း ရေးတာ မဟုတ်ပါ။
ဆရာဝန်ကိုတော့ သူတို့ချင်းခေါ်သလို မခေါ်သင့်ကြောင်း တင်ပြတာဖြစ်တယ်။
နောက်ကွန်မင့်ကတော့ ဘယ်လိုခေါ်ခေါ်ဘာဆိုင်လည်းဆိုသူကို ရီပို့ + ဘလော့ လိုက်ပြီ။
ခဏခဏတင်ပြထားတယ်။ ကျန်းမာရေးမေးခွန်းတွေ ထောင်သောင်း ဖြေရပါတယ်။
ဆရာဝန်ကို အကို၊ ဦးလေး၊ အဘ၊ အန်ကယ် စသဖြင့်အမျိုးစပ်ခေါ်တိုင်း ဆရာဝန့်အမျိုးထဲကလား စဉ်းစားရတယ်။ ပြန်မေးရတယ်။
မေးတဲ့သူက သား၊ သမီးဆိုရင်လည်း ပြန်မေးနေရတယ်။ စာရေးသူလား စာရေးသူရဲ့ သားလား၊ စာရေးသူရဲ့ သမီးလား။
သမီးရဲ့ကောင်လေးဆိုတာ သားမက်လား။
သားကောင်မလေး ချွေးမလား။
သမီးရဲ့သမီး မြေး။
အိမ်မှာ ကိုယ့်ကိုယ်ကိုနဲ့ ကိုယ့်အမျိုးတွေကို ဘယ်လိုခေါ်ခေါ် ပြောရန်မရှိပါ။
သူငယ်ချင်း အပေါင်းအသင်း မိတ်ဆွေနဲ့ ဘယ်လိုခေါ်နေနေ ပြောရန်မရှိပါ။
အွန်လိုင်းပေါ်ကဆရာဝန်က ဗီဒီယိုမသုံးပါ။ မေးတဲ့သူကိုယ်တိုင်က ကျား-မ မပြောရင် အကောင့်အမည်နဲ့ ယောက်ျားလား၊ မိန်းမလား မသိတာတွေ အများကြီး။
မမြင်ရယုံသာမကာ လက်နဲ့တောင်စမ်းမရတဲ့ဆရာဝန်ဟာ ပုဏ္ဏားခြောက်ယောက်ထက် ဒုက္ခိတနဲ့ တူတယ်။
ကျွန်တော်၊ ကျနော်၊ ကျမ၊ ဗျ၊ ခင်ဗျာ၊ ခင်ဗျား၊ ရှင်၊ ရှင့် အသုံးတွေ ပျောက်သလောက်ဖြစ်နေတာ အတော်ကို နှမြောဘို့ကောင်းတယ်။
ဟုတ်ကဲ့ လို့တောင် မှန်အောင်မပြောတတ်သူတွေရှိနေတယ်။ ဟုတ် တလုံးတည်းတောင် မမှန်ကြတော့ပါ။
ဒေါက်တာတင့်ဆွေ
Comments
Post a Comment