ကင်ဆာ ဥပဒေကြမ်း

U.S. House of Representatives is voting again on major cancer priorities

အမေရိကန် အောက်လွှတ်တော်တွင် ကင်ဆာဆိုင်ရာ အရေးကြီး ဦးစားပေးချက်များအပေါ် ထပ်မံ မဲပေးရန် ရှိနေသည်

မဲပေးခြင်းတခါ ထပ်မံဖြစ်လာသော်လည်း အရေးပါမှုက မပြောင်းလဲပါ။ ဤမဲပေးခြင်းသည် လက်ရှိနှင့် အနာဂတ် ကင်ဆာလူနာများအတွက် အလွန်အရေးကြီးပါသည်။

အမေရိကန် အောက်လွှတ်တော်က မူလအတည်ပြုပြီးသား ဥပဒေကြမ်းကို အထက်လွှတ်တော်က ပြင်ဆင်မှုများ ပြုလုပ်ခဲ့သဖြင့် ယခုအခါ အောက်လွှတ်တော်သည် ပြင်ဆင်ပြီးသား ဗားရှင်းအသစ်ကို ထပ်မံ အတည်ပြုမဲပေးရပါမည်။ သင် ယခင်က လုပ်ဆောင်ပြီးသားဖြစ်ပါစေ၊ ယနေ့ ထပ်မံ စာတိုတစောင် ပို့ခြင်းကလည်း အရေးပါနေပါသေးသည်။ ထိုသို့လုပ်ခြင်းဖြင့် ဤမဲပေးခြင်းသည် ကင်ဆာလူနာများအတွက် အဘယ်ကြောင့် အရေးကြီးကြောင်းကို ဥပဒေပြုသူများအား သတိပေးနိုင်ပါသည်။

ဤဥပဒေကြမ်းတွင်

– ကင်ဆာသုတေသနအတွက် ရန်ပုံငွေ တိုးမြှင့်ခြင်း

– ကင်ဆာစစ်ဆေးခြင်းနှင့် ကာကွယ်ရေး အစီအစဉ်များကို အားကောင်းစေခြင်း

– FDA အတည်ပြုပြီး ဆေးဘက်ဆိုင်ရာ အကျိုးရှိကြောင်း သက်သေပြနိုင်သောအခါ မယ်ဒီကဲယား (Medicare) မှ မျိုးစုံကင်ဆာ စောစီးစွာ ရှာဖွေစစ်ဆေးနိုင်သော စမ်းသပ်နည်းများကို အာမခံအောက်တွင် ပါဝင်အောင် လမ်းကြောင်းချမှတ်ပေးခြင်း

တို့ ပါဝင်ပါသည်။

အထက်လွှတ်တော်သည် ဘဏ္ဍာရေးကန့်သတ်ချက်များနှင့် ဆေးဘက်ဆိုင်ရာ နည်းပညာတိုးတက်မှုများကို ချိန်ညှိရန်အတွက် ကင်ဆာတိုက်ဖျက်ရေး ဦးစားပေးချက်များကို မကြာခဏ ပြင်ဆင်လေ့ရှိပါသည်။ ထိုပြင်ဆင်မှုများကြောင့် သုတေသနရန်ပုံငွေ၊ စစ်ဆေးခွင့်ရရှိမှု တိုးချဲ့ရေးနှင့် အာမခံစည်းမျဉ်း ပြောင်းလဲမှုများအကြား ဦးစားပေးချက်များ ပြောင်းရွှေ့တတ်ပါသည်။ မကြာသေးမီက ပြောင်းလဲမှုများအနက် စောစီးစွာ စစ်ဆေးနိုင်သော စမ်းသပ်နည်းများအတွက် မယ်ဒီကဲယား အာမခံကို ပိုမိုခိုင်မာစေခြင်းနှင့် ရန်ပုံငွေအဆင့်အတန်းအပေါ် နိုင်ငံရေးအမြင်ကွာခြားမှုများကို ကိုင်တွယ်ရခြင်းတို့ ပါဝင်ပါသည်။

အထက်လွှတ်တော်က ပြင်ဆင်မှုများ ပြုလုပ်ရသော အဓိကအကြောင်းရင်းများ

ရန်ပုံငွေနှင့် နည်းပညာတိုးတက်မှုကို ချိန်ညှိခြင်း – တိုးတက်မှုများကို ထောက်ပံ့လိုသော်လည်း ဘတ်ဂျက်လိုအပ်ချက်များ အပြိုင်အဆိုင် ရှိနေသဖြင့် သုတေသနနှင့် ဆေးကုသရေး စမ်းသပ်မှုများအကြား ရန်ပုံငွေ ခွဲဝေမှု ပြောင်းလဲတတ်ပါသည်။

နည်းပညာအသစ်များ တိုးတက်လာခြင်း – မယ်ဒီကဲယားမှ မျိုးစုံကင်ဆာ စောစီးစွာ ရှာဖွေစစ်ဆေးနိုင်သော နည်းပညာအသစ်များကို အာမခံပေးနိုင်ရန် ဥပဒေကို ပြင်ဆင်ရပါသည်။

နိုင်ငံရေးအမြင် မတူညီမှုများ – ကင်ဆာမုန်းရှော့ (Cancer Moonshot) ကဲ့သို့ အစီအစဉ်များအတွက် ရန်ပုံငွေအဆင့်အတန်းအပေါ် အမြင်ကွာခြားမှုများ သို့မဟုတ် ကျန်းမာရေးဥပဒေကြမ်းများနှင့် မသက်ဆိုင်သော အငြင်းပွားဖွယ် ပြင်ဆင်ချက်များကို ထည့်သွင်းခြင်းတို့ကြောင့် ပြောင်းလဲမှုများ ဖြစ်ပေါ်လာပါသည်။

ကျန်းမာရေးဝန်ဆောင်မှု ရယူနိုင်မှုနှင့် အာမခံအကာအကွယ် – အချို့ပြင်ဆင်မှုများသည် အာမခံပရီမီယံ ဖွဲ့စည်းပုံ သို့မဟုတ် မီဒီကိတ် (Medicaid) ကို ပြောင်းလဲရန် ဦးတည်ပြီး အချို့သူများအတွက် ကုသခွင့် ပိုမိုရရှိစေနိုင်သော်လည်း အခြားသူများအတွက် ကန့်သတ်ချက်များ ဖြစ်စေနိုင်ပါသည်။

ကာကွယ်ရေးကို ဦးစားပေးခြင်း – ရင်သားနှင့် သားအိမ်ဝကင်ဆာ စောစီးစွာ ရှာဖွေစစ်ဆေးရေး အစီအစဉ်ကဲ့သို့ အစီအစဉ်များမှတဆင့် စောစီးစွာ တွေ့ရှိနိုင်ရေးကို ဦးစားပေးရန် ပြင်ဆင်မှုများ ပြုလုပ်ပါသည်။

၂၀၂၆ ခုနှစ် အစောပိုင်းတွင် ကင်ဆာစစ်ဆေးမှုများအတွက် မယ်ဒီကဲယား အာမခံကို ပိုမိုခိုင်မာစေခြင်းနှင့် သုတေသနရန်ပုံငွေ စီမံခန့်ခွဲမှုအပေါ် ဆွေးနွေးငြင်းခုံမှုများ ဆက်လက်ရှိနေပြီး၊ အထက်လွှတ်တော်က ပြင်ဆင်ထားသော အချက်များကို အောက်လွှတ်တော်မှ အတည်ပြုရန် လိုအပ်နေဆဲ ဖြစ်ပါသည်။

ကောက်ချက်

ရီပတ်ဘလီကန်များကြီးစိုးထားတဲ့ လွှတ်တော်က လူအများစုခံစားခွင့်နည်းစေအောင် ကျန်းမာရေးနဲ့ ကာကွယ်ဆေးဆိုင်ရာ ဥပဒေတွေကို အမြဲတမ်းကန့်သတ်နေတယ်။ သူတို့က လူချမ်းသာတွေကိုသာ ဦးစားပေးကြတယ်။ တခြားနိုင်ငံတွေကနေ လာရောက်နေထိုင်သူတွေကို မတရားတင်းကြပ်မှုတွေလုပ်ကြတယ်။ ဗီဇာတွေပိတ်တယ်။ အကူအညီတွေ ရပ်ပစ်တယ်။ 

အခုတခါ ကင်ဆာ။ လက်ရှိ အမေရိကန်နိုင်ငံရေးကလည်း ကင်ဆာတမျိုး။

ဒေါက်တာတင့်ဆွေ