Summer Health Tips for Kids: Keep Them Safe, Hydrated, and Happy

ကလေးငယ်များအတွက် နွေရာသီကျန်းမာရေးလမ်းညွှန်- ဘေးကင်း၊ လန်းဆန်း၊ ပျော်ရွှင်စေဖို့

နွေရာသီသည် နေရောင်ခြည်၊ အားလပ်ရက်များ၊ ကစားချိန်များနှင့် အရသာရှိသော ရာသီစာများ သယ်ဆောင်လာတတ်သည်။ သို့သော် ပျော်ရွှင်မှုများနှင့်အတူ မြင့်တက်လာသော အပူချိန်၊ အပူလှိုင်းဖြတ်ခြင်းနှင့် ပြင်ပနေရောင်ခြည်တို့ကြောင့် ကလေးငယ်များတွင် ကျန်းမာရေးဆိုင်ရာ စိန်ခေါ်မှုများလည်း ကြုံတွေ့ရနိုင်ပါသည်။

မိဘများအနေဖြင့် နွေရာသီကို မသက်မသာဖြစ်သော ရာသီတခု မဖြစ်စေဘဲ ပျော်ရွှင်စရာရာသီတခုအဖြစ် ဖန်တီးပေးရန် အရေးကြီးသည်။ ထို့ကြောင့် သင့်ကလေး၏ ကျန်းမာရေးကို ကာကွယ်ရန်နှင့် နေရောင်ခြည်အောက်တွင် အပြည့်အဝ ပျော်ရွှင်နိုင်စေရန်အတွက် အောက်ပါ လက်တွေ့ကျသော အချက်များကို လိုက်နာသင့်ပါသည်။

၁။ ရေဓာတ်ပြည့်ဝအောင် နေပါ

နွေပူရှိန်ကြောင့် ရေဓာတ်ခမ်းခြောက်မှုသည် လျင်မြန်စွာ ဖြစ်ပေါ်နိုင်သည်။ ကလေးများသည် ကစားနေစဉ် ရေငတ်သည်ကို သတိမပြုမိတတ်သဖြင့် မိဘများက ဂရုစိုက်ပေးရမည်။

ရေမငတ်သော်လည်း ပုံမှန်ရေသောက်ရန် တိုက်တွန်းပါ။

အုန်းစိမ်းရည်၊ သံပရာရည် သို့မဟုတ် အိမ်တွင်းလုပ် သစ်သီးဖျော်ရည်များ တိုက်ကျွေးပါ။

ရေသန့်ဗူးများကို ကလေးများ အလွယ်တကူ မြင်နိုင်သောနေရာ၌ ထားရှိပါ။

ရေကို ပျော်ရွှင်စွာ သောက်နိုင်ရန် သစ်သီးစိတ်များ ထည့်ပေးခြင်း သို့မဟုတ် ရောင်စုံဖန်ခွက်များဖြင့် တိုက်ကျွေးခြင်းတို့ကို ပြုလုပ်ပါ။

၂။ နေရောင်ခြည်ဒဏ်မှ ကာကွယ်ပါ

ကလေးငယ်များ၏ အရေပြားသည် လူကြီးများထက် ပို၍ နုနယ်သဖြင့် နေလောင်လွယ်သည်။

SPF 30 နှင့်အထက်ရှိသော နေလောင်ကာခရင်မ် (Sunscreen) ကို အသုံးပြု၍ ၂ နာရီ သို့မဟုတ် ၃ နာရီခြား တခါ လိမ်းပေးပါ။

အရောင်ဖျော့သော ချည်ထည်လက်ရှည်များနှင့် ဦးထုပ်များကို ဝတ်ဆင်ပေးပါ။

နေရောင်အပြင်းဆုံးအချိန်ဖြစ်သော နံနက် ၁၁ နာရီမှ ညနေ ၃ နာရီအတွင်း အပြင်ထွက်ခြင်းကို ရှောင်ကြဉ်ပါ။

ကလေးများ၏ မျက်လုံးကို ကာကွယ်ရန် နေကာမျက်မှန် တပ်ပေးပါ။

၃။ ပေါ့ပါး၍ ကျန်းမာသော ရာသီစာများကို ရွေးချယ်ပါ

နွေရာသီသည် ခန္ဓာကိုယ်ကို အေးမြစေပြီး အစာခြေစနစ်ကို ကောင်းမွန်စေသော သစ်သီးဝလံများနှင့် မိတ်ဆက်ပေးရန် အကောင်းဆုံးအချိန်ဖြစ်သည်။

ဖရဲသီး၊ သခွားသီး၊ သရက်သီးနှင့် ဘယ်ရီသီးများကို ကျွေးမွေးပါ။

လေးလံသော၊ ဆီကြော်စာများနှင့် အလွန်အမင်း စပ်သော အစားအစာများကို ရှောင်ကြဉ်ပါ။

ပမာဏနည်းနည်းဖြင့် အကြိမ်ရေခွဲ၍ ကျွေးခြင်းက ကလေးကို ပို၍ လန်းဆန်းစေသည်။

၄။ ဝတ်စားဆင်ယင်မှု သတိပြုပါ

လေဝင်လေထွက်ကောင်းသော ချည်သားအဝတ်အထည်များကိုသာ ရွေးချယ်ဝတ်ဆင်ပေးပါ။

အပူနှင့် ချွေးကို ပိတ်လှောင်စေသော နိုင်လွန် သို့မဟုတ် ကျပ်ထုတ်သော အဝတ်အထည်များကို ရှောင်ပါ။

အပြင်ထွက်လျှင် အပိုအဝတ်တစုံ အမြဲယူဆောင်သွားပါ။

ခြေထောက်ချွေးထွက်ခြင်းနှင့် မှိုစွဲခြင်းမှ ကာကွယ်ရန် လေဝင်လေထွက်ကောင်းသော ဖိနပ်များကို စီးပေးပါ။

၅။ သန့်ရှင်းမှုကို ဦးစားပေးပါ

ပူအိုက်သော ရာသီတွင် ချွေး၊ ဖုန်မှုန့်နှင့် ပိုးမွှားများ ပြန့်ပွားလွယ်သည်။

ပုံမှန် ရေချိုးခြင်းနှင့် လက်ဆေးခြင်းကို ပြုလုပ်ပေးပါ။

ခြေသည်း၊ လက်သည်းများကို တိုတိုနှင့် သန့်သန့်ထားပါ။

ရေသန့်ဗူး၊ ထမင်းချိုင့်နှင့် တဘက်များကို နေ့စဉ် ဆေးကြောသန့်စင်ပါ။

၆။ ပိုးမွှားနှင့် အင်းဆက်အန္တရာယ်မှ ကာကွယ်ပါ

ခြင်နှင့် ယင်ကောင်များသည် နွေရာသီတွင် ပို၍ ပေါများပြီး ရောဂါများ သယ်ဆောင်လာနိုင်သည်။

ကလေးများအတွက် ဘေးကင်းသော ခြင်ပြေးဆေးများကို သုံးပါ။

အိမ်ပတ်ဝန်းကျင်၌ ရေတင်ကျန်ခြင်း မရှိစေရန် ဂရုပြုပါ။

မြက်တော သို့မဟုတ် သစ်ပင်ထူထပ်သော နေရာသို့သွားလျှင် အဝတ်အစား လုံလုံခြုံခြုံ ဝတ်ပေးပါ။

၇။ လုံလောက်စွာ အနားယူပါ

နွေရာသီ အားလပ်ရက်များတွင် ကလေးများ၏ အိပ်ချိန် ပျက်ယွင်းတတ်သော်လည်း အနားယူရန် အလွန်လိုအပ်ပါသည်။

ပုံမှန် အိပ်ချိန်ကို ထိန်းသိမ်းပါ။

နေပူရှိန်ပြင်းသော အချိန်များတွင် အိမ်တွင်း၌ စာဖတ်ခြင်း၊ ပန်းချီဆွဲခြင်း စသည့် ပေါ့ပါးသော လုပ်ငန်းများကိုသာ လုပ်ဆောင်စေပါ။

နွေရာသီသည် ကလေးများအတွက် ပျော်ရွှင်စရာ၊ သင်ယူစရာနှင့် ကြီးထွားဖွံ့ဖြိုးစရာ ရာသီတခု ဖြစ်ပါသည်။ မိဘများအနေဖြင့် အနည်းငယ်မျှ ကြိုတင်ပြင်ဆင်၍ ဂရုစိုက်ပေးရုံဖြင့် သင့်ကလေး၏ ကျန်းမာရေးကို မထိခိုက်စေဘဲ အကောင်းဆုံးသော နွေရာသီနေ့ရက်များကို ဖန်တီးပေးနိုင်ပါမည်။

ဒေါက်တာတင့်ဆွေ