Subconjunctival hemorrhage မျက်လုံးဖြူပေါ်တွင် သွေးခြေဥခြင်း

အသက် ၄၉ အိမ်ထောင်မရှိ သွေးဆုံးတာ ၅နှစ်ကျော်ပါပြီဆရာ ၁၁ရက်နေ့လည်(နေ့လယ်) ၁၁နာရီလောက်က သွေးပေါင်ချိန် 160/90 နဲ့ သွေးတိုးပြီး မျက်လုံးသွေးကြောစိမ့်လို့ မျက်လုံးအထူးကုနဲ့ ပြထားပါတယ်ဆရာ VIASYN မျက်စဥ်းနဲ့ vitacee တကဒ် flummox ၂ကဒ်ပေးလိုက်ပါတယ် ခုထိမသက်သာဘဲ သွေးစိမ့်ဧရိယာပိုကျယိလာလို့ဆရာ သွားပြန်ပြဖို့ကဝေးနေလို့ဆရာ

ပြန်စာ

မျက်လုံးအတွင်းရှိ အလွန်သေးငယ်သော သွေးကြောလေးတခု ပေါက်ထွက်သွားရာမှ မျက်လုံး၏ အဖြူရောင်အပိုင်း (Sclera) ပေါ်တွင် နီရဲသော အကွက်အပြောက်တခု ပေါ်လာခြင်း ဖြစ်သည်။ ယင်းသည် ဘေးဥပဒ်မရှိသည့်အပြင် အများအားဖြင့် နာကျင်မှုလည်း မရှိပါ။ မြင်တွေ့ရသည်မှာ စိုးရိမ်စရာကောင်းသော်လည်း ပုံမှန်အားဖြင့် အမြင်အာရုံကို ထိခိုက်ခြင်း သို့မဟုတ် နာကျင်ခြင်း မရှိဘဲ အရေပြားပေါ်ရှိ အညိုအမည်းစွဲခြင်းနှင့် ဆင်တူကာ တပတ်မှ နှစ်ပတ်အတွင်း အလိုအလျောက် ပြန်လည်ပျောက်ကဲသွားလေ့ရှိသည်။ 

ဖြစ်ပွားရသောအကြောင်းရင်းများနှင့် လက္ခဏာများ

• အကြောင်းရင်းများ: ချောင်းဆိုးခြင်း၊ နှာချေခြင်း၊ အန်ခြင်း၊ အညှစ်လွန်ခြင်း သို့မဟုတ် လေးလံသော ပစ္စည်းများကို မခြင်းတို့ကြောင့် သွေးဖိအား ရုတ်တရက် မြင့်တက်လာရာမှ ဖြစ်ပွားတတ်သည်။ ထို့အပြင် မျက်လုံးကို အနည်းငယ် ထိခိုက်မိခြင်း၊ မျက်ကပ်မှန် တပ်ဆင်ခြင်း သို့မဟုတ် အချို့သောအခြေအနေများတွင် သွေးတိုးခြင်းနှင့် သွေးကျဲဆေးများ သောက်သုံးခြင်းတို့ကြောင့်လည်း ဖြစ်နိုင်ပါသည်။

• လက္ခဏာများ: မျက်လုံး၏ အဖြူရောင်အပိုင်းပေါ်တွင် နီရဲသော အကွက်တခု ပေါ်လာခြင်းမှာ အဓိက လက္ခဏာဖြစ်သည်။ မျက်လုံးထဲတွင် အနည်းငယ် ယားကျိကျိ ဖြစ်ခြင်း သို့မဟုတ် တခုခု ခိုးလိုးခုလု ဖြစ်ခြင်းမျိုး ခံစားရနိုင်သော်လည်း ယေဘုယျအားဖြင့် နာကျင်မှု မရှိပါ။

ကုသခြင်းနှင့် ပြန်လည်ကောင်းမွန်လာခြင်း

• ကုသခြင်း: ယေဘုယျအားဖြင့် မည်သည့် ကုသမှုမျှ ပြုလုပ်ရန် မလိုအပ်ပါ။

• ပြန်လည်ကောင်းမွန်လာခြင်း: အဆိုပါ သွေးကွက်သည် ၇ ရက်မှ ၁၄ ရက်အတွင်း မျက်လုံးထဲသို့ အလိုအလျောက် ပြန်လည်စိမ့်ဝင် ပျောက်ကွယ်သွားလေ့ရှိသည်။ ပြန်လည်ပျောက်ကင်းလာချိန်တွင် အရေပြားပေါ်ရှိ အညိုအမည်းစွဲခြင်းကဲ့သို့ပင် အဝါရောင် သို့မဟုတ် အစိမ်းရောင်သို့ အရောင် ပြောင်းလဲသွားနိုင်ပါသည်။

• ဖြည့်စွက်စောင့်ရှောက်မှု: မျက်လုံးထဲတွင် တခုခု ခုနေသကဲ့သို့ ခံစားရပါက မျက်ရည်တု (Artificial tears) ကို အသုံးပြုနိုင်ပါသည်။

မည်သည့်အချိန်တွင် ဆရာဝန်နှင့် ပြသသင့်သနည်း

ဤအခြေအနေသည် စိုးရိမ်စရာ အလွန်ရှားပါးသော်လည်း အကယ်၍ သင်သည် နာကျင်မှု ခံစားရခြင်း၊ အမြင်အာရုံ ပြောင်းလဲသွားခြင်း သို့မဟုတ် သွေးခြေဥခြင်းမှာ နှစ်ပတ်မှ သုံးပတ်အထိ မပျောက်ကင်းဘဲ ရှိနေပါက ဆရာဝန်နှင့် ပြသသင့်သည်။ အကယ်၍ သင့်တွင် သွေးမတိတ်သည့်ရောဂါ အခံရှိခြင်း၊ သွေးတိုးရောဂါရှိခြင်း သို့မဟုတ် သွေးကျဲဆေးများ သောက်သုံးနေရပါက ယင်းအချက်ကို ဆရာဝန်အား ပြောပြရန် လိုအပ်ပါသည်။

ဒေါက်တာတင့်ဆွေ