Doctor ဆ ဆရာဝန်

ဆရာ ကျမတို့လို ကျန်းမာရေးဝန်ထမ်းတွေ တစ်ပတ်(တပတ်) ၆၀ နာရီ ထက်မက အလုပ်လုပ်ရတဲ့ သူတွေကို သုတေသန ပြုထားတာရှိမလားဆရာ၊ သိချင်ပါတယ်။

ချက်ချင်းတော့ မတွေ့သေးပါ။ တွေ့တာလေးသာ ရေးပါရစေ။

• ဆရာဝန်တွေဟာ တနေ့မှာ ၁၂ နာရီဆက်တိုက်ကနေ ၁၄ နာရီဆက်တိုက်အလုပ်လုပ်နိုင်ကြတယ်။

• အမေရိကားမှာ Resident doctors ဆရာဝန်တွေ တပါတ်မှာ ပျမ်းမျှ ၁ဝ၅ နာရီအလုပ်လုပ်ကြရတယ်။

• Accreditation Council for Graduate Medical Education အဖွဲ့အစည်းကပြောတာက တပါတ်မှာ နာရီ ၈ဝ၊ ၂၄ နာရီ ဆက်တိုက်ထက် ပိုမလုပ်သင့်။ တပါတ်မှာ နားရက် အနည်းဆုံး ၁ ရက်ရှိသင့်တယ်လို့ ဆိုပါတယ်။ အခုထိတော့ ဆရာဝန်တွေဟာ တနေ့မှာ ၁၃ နာရီ၊ ၆ ရက်ဆက်တိုက် အလုပ်လုပ်နေကြရပါတယ်။

ဆရာဝန်တွေ 

• Workplace stress လုပ်ငန်းခွင်ဖိစီးမှုက ဒုက္ခပေးနေတယ်။

• Exposure to infectious diseases ကူးစက်ရောဂါတွေနဲ့ ထိတွေ့နေကြရတာ၊

• Hazardous substances အန္တရာယ်မကင်းတာတွေနဲ့ အတူနေရတာတွေကနေ ဆရာဝန်တွေကို ကျန်းမာရေး ထိခိုက်စေတယ်။

• National Institute for Occupational Safety and Health အစီရင်ခံစာတခုအဆိုအရ Substance abuse ဆေးစွဲမှုနဲ့ Suicide ကိုယ့်ကိုယ်ကိုသတ်သေမှု သူများတွေထက်များနေတယ်လို့ သိရတယ်။

• Depression စိတ်ကျတာနဲ့ anxiety စိုးရိမ်စိတ်ကဲတာ ပိုများကြသေးတယ်။

• ဒါတွေကြောင့် ခြေကုန်လက်ပမ်းကျတာ၊ အလုပ်ပျက်ကွက်တာနဲ့ ဆုံးဖြတ်ချက်မှားယွင်းတာတွေကို ဖြစ်စေတယ်။ လူနာကျေနပ်မှုကိုလည်း နည်းစေတယ်။

အမျိုးသမီး ဆရာဝန်-ဆရာမတွေ

• သူများထက်ထူးပြီး စိတ်ဖိအားများတာကိုခံကြရတယ်။ WHO အဆိုအရ Musculoskeletal injury ကြွကာ်း-အရိုးထိခိုက်မှု ပိုများကြတာတွေ့ရတယ်။ ခြေကုန်လက်ပမ်းကျတာလဲ ပိုဖြစ်ကြတယ်။ Hazardous drugs and chemicals အန္တရာယ်မကင်းတဲ့ ဓါတ်ပစ္စည်းတွေကြောင့် Spontaneous abortion အလိုလိုကိုယ်ဝန်ပျက်တာနဲ့ မွေးလာတဲ့ကလေး Congenital malformations မွေးရာပါချို့ယွင်းချက်ပါတာတွေဖြစ်စေတယ်။

• တချို့နိုင်ငံတွေမှာ Gender-based violence လုပ်ဖေါ်ကိုင်ဖက်တွေကနေဖြစ်ဖြစ်၊ လူနာတွေကနေဖြစ်ဖြစ် လိင်အခြေခံ အကြမ်းဖက်မှုလုပ်တာကိုလဲ ခံကြရတယ်။

လူနာတွေနဲ့ လူနာစောင့်တွေက On-the-job injury လုပ်ငန်းခွင် ထိခိုက်ဒဏ်ရာ ရကြတယ်။

ဒေါက်တာတင့်ဆွေ

၂၅-၁၀-၂၀၁၃