Lamb bone broth ဆိတ်ရိုးစွပ်ပြုတ်

အရသာရှိလှသော သိုး(ဆိတ်)ရိုးစွပ်ပြုတ်ကို ပြုလုပ်ရန်အတွက် သိုး(ဆိတ်)ရိုး (၃ ပေါင်ခန့်) ကို ၄၀၀ ဒီဂရီ ဖာရင်ဟိုက်ရှိသော အပူချိန်တွင် ၂၅ မိနစ်မှ ၃၀ မိနစ်ခန့်အထိ အရောင်ညိုလာသည်အထိ ဖုတ်ပေးရပါမည်။ ထို့နောက် အိုးကြီးတလုံးထဲတွင် ရေ ၁၆ ခွက်၊ ကြက်သွန်နီ၊ မုန်လာဥနီ၊ တရုတ်နံနံ၊ ကြက်သွန်ဖြူနှင့် ဟင်းခတ်အမွှေးအကြိုင်များ ထည့်သွင်း၍ ၄ နာရီမှ ၈ နာရီခန့်အထိ မီးအေးအေးဖြင့် တည်ပေးရပါမည်။ စွပ်ပြုတ်ကို စစ်ယူပြီးနောက် အရိုးမှ အသားများကို နွှင်ယူ၍ ၎င်းအသားများကို ဟင်းသီးဟင်းရွက်များ၊ ဘာလီစေ့ (Barley) တို့နှင့်အတူ နောက်ထပ် မိနစ် ၃၀ မှ ၆၀ ခန့်အထိ တည်ထားရပါမည်။

ကင်ထားသော သိုး(ဆိတ်)ရိုးစွပ်ပြုတ် အခြေခံပြုလုပ်နည်း

ဤနည်းလမ်းသည် ပျစ်၍ အရောင်ရင့်သော စွပ်ပြုတ်ကြည်ကို ရရှိစေပါသည်။

အရိုးကင်ခြင်း - ဖိုကို ၃၉၀-၄၀၀ ဒီဂရီ ဖာရင်ဟိုက်တွင် အပူပေးထားပါ။ သိုး(ဆိတ်)၏ ခြေထောက်ရိုး၊ လည်ပင်းရိုး (သို့မဟုတ်) နံရိုးများကို မိနစ် ၃၀ မှ ၄၀ ခန့်အထိ အရောင်ညိုလာအောင် ကင်ပေးပါ။

တည်ခြင်း - ကင်ထားသော အရိုးများကို အိုးကြီးထဲသို့ ပြောင်းထည့်၍ အိုးကပ်နေသော အဆီများကိုပါ ခြစ်ယူထည့်ပါ။ ရေအေး ၁ ဂါလံ (၁၆ ခွက်) ထည့်၍ ဖုံးအုပ်ထားပါ။

အနံ့အရသာဖြည့်စွက်ခြင်း - ကြက်သွန်နီ ၁ လုံး (လေးစိတ်စိပ်၍ အခွံပါထည့်ရန်)၊ မုန်လာဥနီ ၂-၃ လုံး၊ တရုတ်နံနံ၊ ကြက်သွန်ဖြူ ၁ ဥ၊ သတ္တုဓာတ်များ ထွက်လာစေရန် ပန်းသီးရှာလကာရည် ၁ ဇွန်းနှင့် ငရုတ်ကောင်းစေ့ ၁ ဇွန်းတို့ကို ထည့်ပါ။

အချိန် - အညစ်အကြေးများကို ခပ်ထုတ်ပစ်ရင်း ၄ နာရီမှ ၈ နာရီအထိ မီးအေးအေးဖြင့် တည်ပါ။

စစ်ယူခြင်း - ဇကာစိတ်ဖြင့် စစ်ယူ၍ အဖတ်များကို စွန့်ပစ်ပါ။ တညတာ အအေးခံထားပြီးမှ အပေါ်ယံတွင် ခဲနေသော အဆီခဲများကို ခပ်ထုတ်ပစ်ပါ။

သိုး(ဆိတ်)သားနှင့် ဘာလီစေ့ စွပ်ပြုတ် (Classic Lamb & Barley Soup)

ပြင်ဆင်ခြင်း - အိုးထဲတွင် ကြက်သွန်နီ၊ မုန်လာဥနီနှင့် တရုတ်နံနံတို့ကို ဆီဖြင့် ဆီသတ်ပါ။

ရောစပ်ခြင်း - သိုး(ဆိတ်)ရိုးစွပ်ပြုတ် ၆-၈ ခွက်၊ ဘာလီစေ့ ခွက်တဝက်ခန့်၊ ကော်ဖတ်ရွက် (Bay leaf) နှင့် ဖယ်ထားသော သိုး(ဆိတ်)သားများကို ထည့်ပါ။

တည်ခြင်း - ဘာလီစေ့များ နူးအိသည်အထိ ၁ နာရီခန့် တည်ပါ။

အချောသတ် - မသုံးဆောင်မီ ဆား၊ ငရုတ်ကောင်းနှင့် နံနံပင်တို့ဖြင့် အရသာသွင်းပါ။

သိုး(ဆိတ်)သားနှင့် အာလူးစွပ်ပြုတ် (Hearty Lamb & Potato Soup)

ဆီသတ်ခြင်း - ကြက်သွန်နီနှင့် ကြက်သွန်ဖြူကို ဆီသတ်ပြီးနောက် စွပ်ပြုတ် ၆ ခွက်ထည့်၍ ဆူပွက်အောင် တည်ပါ။

ဟင်းသီးဟင်းရွက်များ - အတုံးသေးတုံးထားသော မုန်လာဥနီ၊ အာလူးနှင့် ဆန် ၃ ဇွန်း (စွပ်ပြုတ်ပျစ်စေရန်) တို့ကို ထည့်ပါ။

တည်ခြင်း - ဟင်းသီးဟင်းရွက်များ နူးသည်အထိ မိနစ် ၃၀ ခန့် တည်ပါ။

အချောသတ် - နွှင်ထားသော သိုး(ဆိတ်)သားများ၊ သံပရာရည်နှင့် နံနံပင်တို့ကို ထည့်သွင်းပါ။

အဓိက မှတ်ချက်များ

အသားပါသော အရိုးများ - စွပ်ပြုတ်တွင် အသားပိုရစေရန် သိုး(ဆိတ်)ဂျုံရိုး သို့မဟုတ် လည်ပင်းရိုးများကို အသုံးပြုပါ။

ပိုမိုကောင်းမွန်သော အရသာ - ဟင်းသီးဟင်းရွက်များကို အရိုးနှင့်အတူ ကင်ပေးပါက ပိုမိုချိုမြိန်သော အရသာကို ရရှိစေပါသည်။

စွပ်ပြုတ်ကြည်ရန် - စွပ်ပြုတ်ကြည်လိုပါက အရိုးများကို ရေနွေးပွက်ပွက်တွင် ၁ မိနစ်ခန့် ပြုတ်၍ ၎င်းရေကို သွန့်ပစ်ပြီးမှ ကင်သည့်အဆင့်သို့ ဆက်သွားပါ။

စွပ်ပြုတ်ပျစ်စေရန် - ဘာလီစေ့၊ ပဲနီလေး သို့မဟုတ် အာလူးတို့သည် စွပ်ပြုတ်ကို ပျစ်စေသော ရိုးရာနည်းလမ်းများ ဖြစ်ကြပါသည်။

သိုး(ဆိတ်)ရိုးစွပ်ပြုတ်၏ ကျန်းမာရေးဆိုင်ရာ အကျိုးကျေးဇူးများ

သိုး(ဆိတ်)ရိုးစွပ်ပြုတ်သည် ခန္ဓာကိုယ်အတွက် လိုအပ်သော အဟာရဓာတ်များ ကြွယ်ဝရုံမျှမက၊ ကော်လာဂျင် (Collagen) ဓာတ် အမြောက်အမြား ပါဝင်သောကြောင့် အူလမ်းကြောင်း ကျန်းမာရေးကို အထောက်အကူပြုခြင်း၊ အဆစ်အမြစ် ကိုက်ခဲခြင်းကို သက်သာစေခြင်းနှင့် အရေပြားကို စိုပြေစေခြင်း စသည့် အကျိုးကျေးဇူးများကို ရရှိစေပါသည်။ ၎င်းတွင်ပါဝင်သော ဂျယ်လတင် (Gelatin)၊ အမိုင်နိုအက်ဆစ် (Amino acids) နှင့် သတ္တုဓာတ်များသည် အူနံရံများကို ခိုင်မာစေပြီး ရောင်ရမ်းမှုများကို လျော့ကျစေသည့်အပြင် နှစ်ခြိုက်စွာ အိပ်ပျော်စေရန်လည်း ကူညီပေးပါသည်။ အထူးသဖြင့် အဆစ်အမြစ်များ သန်စွမ်းစေရန်နှင့် အရည်အသွေးမြင့် ပရိုတင်း (Protein) ဓာတ်များ ရရှိရန်အတွက် အလွန်ကောင်းမွန်သော အစားအစာ ဖြစ်ပါသည်။

သိုး(ဆိတ်)ရိုးစွပ်ပြုတ်၏ အဓိက ကျန်းမာရေး အကျိုးကျေးဇူးများ

အူလမ်းကြောင်းနှင့် အစာခြေစနစ်ကို အထောက်အကူပြုခြင်း: သိုး(ဆိတ်)ရိုးစွပ်ပြုတ်တွင် ပါဝင်သော ဂျယ်လတင်ဓာတ်သည် အူလမ်းကြောင်း နံရံများကို ကာကွယ်ပေးပြီး ခိုင်မာစေပါသည်။ ၎င်းသည် အစားအစာများအပေါ် တုံ့ပြန်မှုလွန်ကဲခြင်းကို တားဆီးပေးပြီး အစာခြေစနစ်ရှိ အကျိုးပြု ဘက်တီးရီးယားများကို ဖွံ့ဖြိုးစေပါသည်။ အစာအိမ် မအီမသာဖြစ်ခြင်းကို သက်သာစေရန်နှင့် အစာခြေစနစ် တခုလုံးကို ကောင်းမွန်စေရန်အတွက် အသုံးပြုကြပါသည်။

အဆစ်အမြစ်နှင့် အရိုးများ သန်စွမ်းခြင်း: သဘာဝ ကော်လာဂျင်၊ ဂျယ်လတင်နှင့် ဂလူကိုဆာမင်း (Glucosamine) တို့ ကြွယ်ဝစွာ ပါဝင်သဖြင့် အဆစ်အမြစ်များအတွက် ချောဆီသဖွယ် ဆောင်ရွက်ပေးကာ လှုပ်ရှားရလွယ်ကူစေပြီး နာကျင်မှုများကို လျော့ပါးစေပါသည်။ ထို့ပြင် အရိုးများ သန်စွမ်းစေရန် လိုအပ်သော ကယ်လ်စီယမ် (Calcium) နှင့် ဖော့စဖရပ် (Phosphorus) ဓာတ်များကိုလည်း ပေးစွမ်းနိုင်ပါသည်။

ကိုယ်ခံစွမ်းအားကို မြှင့်တင်ပေးခြင်း: သိုး(ဆိတ်)ရိုးစွပ်ပြုတ်တွင် အာဂျင်နင်း (Arginine) နှင့် ဂလူတမင်း (Glutamine) ကဲ့သို့သော အမိုင်နိုအက်ဆစ်များ ပါဝင်ပါသည်။ ၎င်းတို့သည် ကိုယ်ခံအားဆဲလ်များ၏ လုပ်ဆောင်ချက်ကို ကောင်းမွန်စေပြီး ခန္ဓာကိုယ်၏ ခုခံအားစနစ်ကို မြှင့်တင်ပေးပါသည်။

အရေပြား၊ ဆံပင်နှင့် လက်သည်းခြေသည်းများ ကျန်းမာစေခြင်း: ကော်လာဂျင်ဓာတ်သည် အရေပြား၏ ရုန်းကန်အားကို ကောင်းမွန်စေကာ စိုပြေဝင်းပစေပြီး နုပျိုသော ရုပ်ရည်ကို ထိန်းသိမ်းပေးပါသည်။

နှစ်ခြိုက်စွာ အိပ်ပျော်စေခြင်းနှင့် စိတ်ဖိစီးမှု လျော့ကျခြင်း: သိုး(ဆိတ်)သားတွင် စိတ်တည်ငြိမ်စေသော ဆာရိုတိုနင် (Serotonin) ဓာတ်ကို ထုတ်လုပ်ပေးသည့် ထရစ်ပတိုဖန် (Tryptophan) ဓာတ် ပါဝင်သဖြင့် စိတ်လက်ပေါ့ပါး၍ နှစ်ခြိုက်စွာ အိပ်ပျော်စေပါသည်။ ထို့ပြင် ဂလိုင်ဆင်း (Glycine) ဓာတ်သည်လည်း အာရုံကြောစနစ်ကို ငြိမ်သက်စေသည့် အာနိသင်ရှိပါသည်။

ဇီဝကမ္မဖြစ်စဉ်နှင့် အဆိပ်အတောက် ဖယ်ရှားခြင်း: ၎င်းသည် အသည်း၏ အဆိပ်အတောက် ဖယ်ရှားမှု လုပ်ငန်းစဉ်ကို ကူညီပေးသည့်အပြင် ကြွက်သားများ ပြုပြင်ထိန်းသိမ်းရေးအတွက် လိုအပ်သော လျှပ်စစ်ဓာတ် (Electrolytes) များကိုလည်း ပေးစွမ်းပါသည်။

အဟာရဆိုင်ရာ ထူးခြားချက်များ

သိုး(ဆိတ်)ရိုးစွပ်ပြုတ်သည် ကော်လာဂျင် ပရိုတင်းနှင့် မရှိမဖြစ်လိုအပ်သော အမိုင်နိုအက်ဆစ်များ ရရှိနိုင်သည့် အရင်းအမြစ်ကောင်း တခုဖြစ်ပါသည်။ ဖျားနာမှုများမှ ပြန်လည် နာလန်ထူလာစေရန်အတွက် အလွန်ပင် အားရှိစေသော အစားအစာ ဖြစ်ပါသည်။

ဒေါက်တာတင့်ဆွေ