Infantile Hemangiomas မွေးကင်းစကလေးငယ်များရှိ သွေးကြောလုံးအကျိတ် (သွေးရှင်)
ဆရာရှင့် သမီးလေးရဲ့သွေးနီဥလေးကဘာဖြစ်တာလဲရှင့် မွေးတုန်းကမရှိပါဘူးဆရာ မွေးပီး(ပြီး) ၂လလောက်မှပေါ်လာတာပါ ပေါ်တုန်းကမှဲ့အရွယ်အစားအသေးလေးပါ ခုကပိုပိုကြီးလာပါပီ(ပါပြီ) သမီးက ခု၃လကျော်ပါရှင့် စိုးရိမ်းရလားရှင့် ဖြေကြားပေးပါနော်
သွေးကြောလုံးအကျိတ် (Hemangioma) ဆိုသည်မှာ မွေးရာပါ အမှတ်အသားတမျိုး ဖြစ်ပါသည်။ ၎င်းသည် ကလေးငယ်၏ အရေပြားပေါ်တွင် သို့မဟုတ် အရေပြားအောက်ရှိ သွေးကြောများ ပုံမှန်မဟုတ်ဘဲ စုပြုံပွားများလာရာမှ ဖြစ်ပေါ်လာခြင်း ဖြစ်ပါသည်။ အများအားဖြင့် မွေးဖွားပြီး ပထမရက်ပိုင်းမှ လပိုင်းအတွင်း သတိပြုမိတတ်ကြပါသည်။ အစပိုင်းတွင် ကြီးထွားလာတတ်သော်လည်း နောက်ပိုင်းတွင် တဖြည်းဖြည်း ပြန်လည်ပျောက်ကွယ်သွားလေ့ရှိပါသည်။ သို့သော် အချို့မှာ အရေပြားပေါ်တွင် အမှတ်အသား သို့မဟုတ် အရေပြားတွန့်ခြင်းများ ကျန်ရစ်ခဲ့တတ်ပါသည်။
ဖြစ်ပွားနိုင်ခြေရှိသူများ
လမစေ့ဘဲ မွေးဖွားလာသော ကလေးငယ်များ။
မွေးကင်းစ ကိုယ်အလေးချိန် လျော့နည်းသော ကလေးငယ်များ။
အမြွှာမွေးဖွားသူများ။
မျိုးရိုးလိုက်ခြင်းကြောင့်လည်း ဖြစ်နိုင်သော်လည်း မျိုးရိုးဗီဇဆိုင်ရာ အကြောင်းရင်းကိုမူ တိကျစွာ မတွေ့ရှိရသေးပါ။
အမျိုးအစားများ
၁။ အရေပြားပေါ်ရှိ သွေးကြောလုံးအကျိတ် (Superficial hemangiomas) - အရေပြား မျက်နှာပြင်ပေါ်တွင် ဖြစ်ပေါ်ပြီး အနီရောင် အဖုအထစ်များ ရှိသောကြောင့် စတော်ဘယ်ရီအမှတ် (Strawberry mark) ဟုလည်း ခေါ်ကြပါသည်။
၂။ အရေပြားအောက်ရှိ သွေးကြောလုံးအကျိတ် (Deep hemangiomas) - အရေပြားအောက်တွင် ဖြစ်ပေါ်ပြီး အပြာရောင် သို့မဟုတ် ခရမ်းရောင်သန်းသော အဖုအကျိတ်အဖြစ် တွေ့ရတတ်ပါသည်။
အချို့သော ကလေးငယ်များတွင် ဤနှစ်မျိုးလုံး ရောနှော၍လည်း ဖြစ်ပွားနိုင်သလို၊ ခန္ဓာကိုယ်အတွင်းရှိ ကျောက်ကပ်၊ အဆုတ်၊ အသည်းနှင့် ဦးနှောက် စသည့် အင်္ဂါရပ်များတွင်လည်း ဖြစ်ပေါ်နိုင်ပါသည်။
ကြီးထွားမှုဖြစ်စဉ်
ကလေးငယ် မွေးဖွားစတွင် မည်သည့်လက္ခဏာမျှ မတွေ့ရခြင်း သို့မဟုတ် အနီရောင်၊ အပြာရောင် အကွက်ငယ်လေးများသာ တွေ့ရတတ်ပါသည်။ မွေးဖွားပြီး ပထမ လအနည်းငယ်အတွင်း ကြီးထွားလာပြီး၊ အသက် တနှစ်ကျော်လာသောအခါ တဖြည်းဖြည်း ပြန်လည်ကျုံ့ဝင် (Involute) သွားပါသည်။ ဤသို့ ပြန်လည်ကျုံ့ဝင်ခြင်းမှာ အသက် ၇ နှစ် သို့မဟုတ် ထိုထက်မက ကြာမြင့်သည်အထိ ဖြစ်ပေါ်နိုင်ပါသည်။
ဖြစ်ပေါ်လာနိုင်သော ပြဿနာများ
အမြင်အာရုံ သို့မဟုတ် မျက်လုံးလှုပ်ရှားမှုကို အဟန့်အတား ဖြစ်စေခြင်း။
နှာခေါင်း သို့မဟုတ် ပါးစပ်မှတဆင့် လေဝင်လေထွက်ကို ပိတ်ဆို့ခြင်း။
သွေးထွက်ခြင်း သို့မဟုတ် အရေပြား အနာဖြစ်ခြင်း (Ulceration)။
သွေးစီးဆင်းမှု များပြားလွန်းပါက ကလေးငယ်၏ နှလုံးကို ဝန်ပိစေခြင်း။
ရုပ်ရည်ပိုင်းဆိုင်ရာ ထိခိုက်စေခြင်း (အထူးသဖြင့် မျက်နှာနှင့် လည်ပင်းတို့တွင် ဖြစ်ပွားပါက ကလေးငယ်အား စိတ်ပိုင်းဆိုင်ရာ ထိခိုက်စေနိုင်ပါသည်)။
ရောဂါရှာဖွေခြင်းနှင့် ကုသခြင်း
ဆရာဝန်များသည် အကျိတ်၏ ပုံသဏ္ဌာန်နှင့် ဖြစ်ပေါ်လာသည့် အချိန်ကို ကြည့်ခြင်းဖြင့် ရောဂါကို ခွဲခြားနိုင်ပါသည်။ လိုအပ်ပါက MRI သို့မဟုတ် အာထရာဆောင်း (Ultrasound) ရိုက်၍ စစ်ဆေးနိုင်ပါသည်။
ကုသနည်းများ -
အများအားဖြင့် သူ့အလိုလို ပျောက်ကွယ်သွားတတ်သဖြင့် ကုသရန် မလိုပါ။ သို့သော် အကျိတ် အလွန်ကြီးထွားခြင်း၊ သွေးထွက်ခြင်း၊ အမြင်အာရုံ ပိတ်ဆို့ခြင်းနှင့် ရုပ်ရည်ကို ထိခိုက်စေခြင်းမျိုးတွင် အောက်ပါအတိုင်း ကုသနိုင်ပါသည် -
ဆေးဝါးများ - အကျိတ်အတွင်းသို့ ထိုးခြင်း၊ ပါးစပ်မှ သောက်ခြင်း သို့မဟုတ် သွေးကြောအတွင်းသို့ ထည့်ခြင်း။
ခွဲစိတ်ကုသခြင်း - အကျိတ်ကို ဖယ်ရှားခြင်း သို့မဟုတ် ကျန်ရစ်သော အရေပြားကို ပြုပြင်ခြင်း။
သွေးကြောပိတ်ခြင်း (Embolization/Ligation) နှင့် လေဆာ (Laser) အသုံးပြု၍ ကုသခြင်း။
ဒေါက်တာတင့်ဆွေ
Comments
Post a Comment