Chayote ဂေါ်ရခါးသီးသည်
ကျန်းမာရေးအတွက် အောက်စီဒေးရှင်းဆန့်ကျင်ပစ္စည်းများကို ထောက်ပံ့ပေးပါသည်။
အာဟာရဓာတ် ပါဝင်မှု
ဂေါ်ရခါးသီး (Sechium edule) တွင် ကယ်လိုရီနှင့် ကာဘိုဟိုက်ဒရိတ် ပါဝင်မှု နည်းပါးသော်လည်း အမျှင်ဓာတ်၊ ဖောလိပ် (folate)၊ ဗီတာမင်စီ၊ ဗီတာမင်ကေ၊ ဗီတာမင်ဘီ၆၊ မဂ္ဂနီးစ်၊ ကြေးနီဓာတ်နှင့် ဇင့် (သွပ်ဓာတ်) တို့ ကြွယ်ဝစွာ ပါဝင်ပါသည်။ ဂေါ်ရခါးသီး တလုံး (၂၀၃ ဂရမ်ခန့်) ၌ ဆဲလ်များ ပွားများခြင်းနှင့် ကိုယ်ဝန်ဆောင်ချိန် သန္ဓေသား ဖွံ့ဖြိုးမှုအတွက် မရှိမဖြစ် လိုအပ်သော နေ့စဉ်
လိုအပ်သည့် ဖောလိပ်ဓာတ်၏ ၄၇ ရာခိုင်နှုန်းခန့် ပါဝင်ပါသည်။ ယင်း၌ ရေဓာတ် (၉၅ ရာခိုင်နှုန်းခန့်) အမြောက်အမြား ပါဝင်သဖြင့် ခန္ဓာကိုယ်တွင်း ရေဓာတ်ကိုလည်း ဖြည့်တင်းပေးပါသည်။
အစာခြေစနစ် ကျန်းမာရေး
ဂေါ်ရခါးသီးတွင် ပါဝင်သော အမျှင်ဓာတ်သည် အစာခြေစနစ်ကို ချောမွေ့စေပြီး ဝမ်းမှန်စေသည့်အပြင်၊ အူလမ်းကြောင်းဆိုင်ရာ အကျိုးပြုဗက်တီးရီးယားများကို အာဟာရပေးသည့် ပရီဘိုယိုတစ် (prebiotic) အဖြစ် လုပ်ဆောင်ပေးပါသည်။ ထို့ကြောင့် ဝမ်းချုပ်ခြင်းကို ကာကွယ်ပေးနိုင်ပြီး အစာခြေစနစ် တခုလုံး၏ လုပ်ဆောင်ချက်ကို တိုးတက်စေပါသည်။
နှလုံးကျန်းမာရေး
ဂေါ်ရခါးသီး၌ သွေးဖိအားနှင့် ကိုလက်စထရော ပမာဏကို ထိန်းညှိရာတွင် ကူညီပေးနိုင်သော ပိုတက်စီယမ်နှင့် အမျှင်ဓာတ်တို့ ပါဝင်ပါသည်။ ယင်း၌ ပါဝင်သည့် မိုင်ရီစီတင် (myricetin)၊ ကွာစီတင် (quercetin) နှင့် ဗီတာမင်စီ အပါအဝင် အောက်စီဒေးရှင်းဆန့်ကျင်ပစ္စည်းများသည် အောက်စီဒေးရှင်းဒဏ်နှင့် ရောင်ရမ်းမှုများကို လျှော့ချပေးသဖြင့် နှလုံးနှင့် သွေးကြောစနစ် ကျန်းမာရေးကို အထောက်အကူပြုကာ နှလုံးရောဂါ ဖြစ်ပွားနိုင်ခြေကို လျော့ကျစေနိုင်ပါသည်။
သွေးတွင်းသကြားဓာတ် ထိန်းချုပ်မှု
ကာဘိုဟိုက်ဒရိတ် ပါဝင်မှု နည်းပြီး အမျှင်ဓာတ် ကြွယ်ဝသောကြောင့် ဂေါ်ရခါးသီးသည် သွေးတွင်းသကြားဓာတ်ကို ကျန်းမာသော ပမာဏ၌ ထိန်းသိမ်းထားနိုင်ရန် ကူညီပေးပါသည်။ ယင်းသည် ကာဘိုဟိုက်ဒရိတ် စုပ်ယူမှုနှုန်းကို နှေးကွေးစေပြီး အင်ဆူလင် တုံ့ပြန်နိုင်စွမ်းကို တိုးတက်စေနိုင်သဖြင့် အမျိုးအစား-၂ ဆီးချိုရောဂါ ရှိသူများအတွက် အကျိုးရှိပါသည်။
ကိုယ်အလေးချိန်ထိန်းခြင်း
ဂေါ်ရခါးသီးသည် ကယ်လိုရီ နည်းပါးသော်လည်း ရေဓာတ်နှင့် အမျှင်ဓာတ် ပါဝင်မှု မြင့်မားသဖြင့် ဗိုက်ဝလွယ်စေကာ အစားလွန်ခြင်းကို တားဆီးပေးပါသည်။ ပါဝင်သော အမျှင်ဓာတ်က အစာခြေနှုန်းကို နှေးစေပြီး သွေးတွင်းသကြားဓာတ်ကို မျှတစေသဖြင့် ကိုယ်အလေးချိန်ထိန်းရန် အစားအသောက် စာရင်းတွင် ထည့်သွင်းရမည့် တန်ဖိုးရှိသော သီးနှံဖြစ်ပါသည်။
အောက်စီဒေးရှင်းဆန့်ကျင်မှုနှင့် ရောင်ရမ်းမှုဆန့်ကျင်သည့် အာနိသင်များ
ဂေါ်ရခါးသီးတွင် ဆဲလ်များကို အောက်စီဒေးရှင်း ပျက်စီးမှုမှ ကာကွယ်ပေးသည့် ဖလာဗိုနိုက် (flavonoids)၊ ကာရိုတီနိုက် (carotenoids) နှင့် ဖီနောလစ်အက်ဆစ် (phenolic acids) ကဲ့သို့သော အောက်စီဒေးရှင်းဆန့်ကျင်ပစ္စည်းများ ကြွယ်ဝစွာ ပါဝင်သဖြင့် ရောင်ရမ်းမှုကို လျှော့ချပေးကာ အိုမင်းရင့်ရော်သည့် လက္ခဏာများကို နှေးကွေးစေနိုင်ပါသည်။ မက်တာဘောလစ် ရောဂါစု (metabolic syndrome) ရှိသော လူကြီးများတွင် ဂေါ်ရခါးသီး ဖြည့်စွက် စားသုံးခြင်းသည် အောက်စီဒေးရှင်းဆန့်ကျင် အင်ဇိုင်းလုပ်ဆောင်ချက်ကို တိုးတက်စေပြီး အောက်စီဒေးရှင်း ပြဿနာ လက္ခဏာများကို လျှော့ချပေးနိုင်ကြောင်း လေ့လာမှုများက ဖော်ပြထားပါသည်။
ကိုယ်ဝန်ဆောင်ချိန် အဓိကထောက်ပံ့မှု
ဂေါ်ရခါးသီး၌ ဖောလိပ်ဓာတ် ပါဝင်မှု မြင့်မားခြင်းသည် သန္ဓေသား ကြီးထွားမှုအတွက် လွန်စွာ အရေးကြီးပြီး အာရုံကြောချို့ယွင်းချက်များနှင့် လမစေ့ဘဲ မွေးဖွားခြင်းတို့ကို ကာကွယ်ရာတွင် ကူညီပေးနိုင်ပါသည်။
အသည်းနှင့် အရေပြား ကျန်းမာရေး
ဂေါ်ရခါးသီးသည် အဆီစုပုံခြင်းကို လျှော့ချပေးပြီး အာဟာရဓာတ် လောင်ကျွမ်းမှုကို တိုးတက်စေခြင်းဖြင့် အသည်း၏ လုပ်ဆောင်ချက်များကို အထောက်အကူပြုနိုင်ပါသည်။ ထို့ပြင် ယင်း၌ ပါဝင်သော အောက်စီဒေးရှင်းဆန့်ကျင်ပစ္စည်းများနှင့် ဗီတာမင်စီတို့သည် ကော့လဂျင် ထုတ်လုပ်မှုကို ကူညီပေးသဖြင့် အရေပြားကို ပိုမို ကျန်းမာစိုပြေစေပါသည်။
အခြား အကျိုးကျေးဇူးများ
ဂေါ်ရခါးသီးသည် ရေဓာတ်ကိုလည်း ဖြည့်တင်းပေးပြီး ရောင်ရမ်းမှုကို လျော့ကျစေနိုင်ပါသည်။ ယင်း၏ အရွက်၊ အညွန့်နှင့် အခွံတို့တွင် အောက်စီဒေးရှင်းဆန့်ကျင်ပစ္စည်းများနှင့် ပဋိဇီဝဓာတ်ပေါင်းများ ပိုမို စုစည်းပါဝင်သဖြင့် အပိုဆောင်း ကျန်းမာရေး အကျိုးကျေးဇူးများကို ရရှိစေပါသည်။
ဂေါ်ရခါးသီးကို အစိမ်းလိုက်ဖြစ်စေ၊ ချက်ပြုတ်၍ဖြစ်စေ၊ ဖျော်ရည်ပြုလုပ်၍ဖြစ်စေ မိမိ အစားအသောက်တွင် ထည့်သွင်း စားသုံးပေးပါက ကယ်လိုရီ နည်းပါးစွာဖြင့် နည်းလမ်းမျိုးစုံ သုံးဆောင်နိုင်ပြီး ကျန်းမာရေး အကျိုးကျေးဇူး အများအပြားကို ရရှိစေမည် ဖြစ်ပါသည်။
ဒေါက်တာတင့်ဆွေ
Comments
Post a Comment