ဂျာမဏီကလာတဲ့ ဆီးချိုရောဂါကုသနည်းသစ်သတင်း

ပုံထဲကဆေးပညာသတင်းကို တယောက်ပြီးတယောက်က တင်နေကြတာတွေ့လို့ သတင်းပင်ရင်းကိုလိုက်ရှာ၊ ဘာသာပြန်ပြီး တင်ပြလိုက်ပါတယ်။

ဂျာမနီနိုင်ငံ၊ Offenbach မြို့ရှိ ANOVA IRM တွင် Mesenchymal stem cells (secretome) ကို အသုံးပြုသော ဆီးချိုရောဂါ (အမျိုးအစား ၁ နှင့် ၂) အတွက် မျှော်လင့်ချက်ကြီးမားသော ကုသနည်းအသစ်

ဂျာမနီနိုင်ငံ၊ Offenbach မြို့ရှိ ANOVA IRM သည် ဆီးချိုရောဂါ အမျိုးအစား ၁ နှင့် ၂ အတွက် Mesenchymal Stem Cell (MSC) Secretome ကို အသုံးပြုသော ဆန်းသစ်တီထွင်ထားသည့် စမ်းသပ်ကုသနည်းတရပ်ကို ပေးဆောင်လျက်ရှိပါသည်။

MSC Secretome သည် ဆဲလ်များကို မတင်သွင်းဘဲ stem cell များက သဘာဝအလျောက် ထုတ်လွှတ်သော အရေးပါသော ဓာတ်များ ပါဝင်သည့် cell-free ထုတ်ကုန်တခုဖြစ်ပြီး၊ အရောင်ရောင်ခြင်း (inflammation) ကို လျော့နည်းစေခြင်း၊ သရက်ရွက်၏ လုပ်ဆောင်နိုင်စွမ်းကို ပြန်လည်ပြုပြင်ထောက်ပံ့ခြင်းနှင့် အင်ဆူလင်အပေါ် ခံနိုင်ရည်ကို ကောင်းမွန်စေခြင်းတို့ကို ရည်ရွယ်ပါသည်။

ဤနည်းလမ်းသည် stem cell ကုသမှု၏ နောက်တဆင့်မြင့် ချဉ်းကပ်ပုံတရပ်ဖြစ်ပြီး၊ ဆဲလ်များကို တိုက်ရိုက် မပြောင်းလဲဘဲ ဇီဝတက်ကြွဓာတ်များကို ပေးပို့ခြင်းဖြင့် ကိုယ်ခံအားညှိနှိုင်းမှုနှင့် ပြန်လည်မွေးဖွားနိုင်စွမ်းအတွက် အစောပိုင်းရလဒ်ကောင်းများကို ပြသထားပါသည်။

ကုသနည်းဆိုသည်မှာ ဘာလဲ

ဆဲလ်မပါသော နည်းလမ်း (Cell-Free Approach)

stem cell တခုလုံးကို မတင်သွင်းဘဲ၊ stem cell များက သဘာဝအလျောက် ထုတ်လွှတ်သော growth factors၊ exosomes နှင့် cytokines တို့ပါဝင်သည့် “secretome” ကို အသုံးပြုပါသည်။

ကိုယ်ပိုင်ဆဲလ်မှ ဆင်းသက်သော နည်းလမ်း (Autologous – ကိုယ်ပိုင်ဆဲလ်များ)

secretome ကို ကိုယ်ပိုင် MSC များမှ ရယူသဖြင့် ကိုယ်ခံအားက ဆန့်ကျင်တိုက်ခိုက်မည့် အန္တရာယ်ကို လျော့နည်းစေပါသည်။

ပြန်လည်ပြုပြင်နိုင်စွမ်း

ဆီးချိုရောဂါ၏ အခြေခံအကြောင်းရင်းများကို တိုက်ရိုက် ထိန်းချုပ်ရာတွင်

– အမျိုးအစား ၁ တွင် ကိုယ်ခံအား၏ ကိုယ်ပိုင်ဆဲလ်တိုက်ခိုက်မှုကို သက်သာစေခြင်း၊

– အမျိုးအစား ၂ တွင် ရောင်ခြင်းကို လျော့နည်းစေပြီး အင်ဆူလင်ခံနိုင်ရည်ကို တိုးတက်စေခြင်းတို့ကို ရည်ရွယ်ပါသည်။

မျှော်လင့်ချက်ရှိရသော အကြောင်းများ

ကိုယ်ခံအားညှိနှိုင်းမှု

အမျိုးအစား ၁ ဆီးချိုရောဂါတွင် အင်ဆူလင်ထုတ်လုပ်သော ဆဲလ်များကို ကိုယ်ခံအားတိုက်ခိုက်မှုမှ ကာကွယ်ပေးနိုင်ပါသည်။

အင်္ဂါအစိတ်အပိုင်း ပြုပြင်ထောက်ပံ့မှု

အမျိုးအစား ၂ ဆီးချိုရောဂါတွင် ပျက်စီးထားသော အင်ဆူလင်ထုတ်လုပ်ဆဲလ်များကို ပြန်လည်ပြုပြင်ကာ အင်္ဂါအစိတ်အပိုင်းများ၏ လုပ်ဆောင်နိုင်စွမ်းကို ကောင်းမွန်စေပါသည်။

အန္တရာယ်လျော့နည်းမှု

ဆဲလ်မပါသော ထုတ်ကုန်ဖြစ်သဖြင့် အသက်ရှင်သော ဆဲလ်များကို တင်သွင်းရာမှ ဖြစ်နိုင်သော အန္တရာယ်များကို လျော့နည်းစေပြီး၊ သိုလှောင်ထားနိုင်သဖြင့် သတ်မှတ်အချိန်ကာလအလိုက် အသုံးချနိုင်ပါသည်။

ANOVA IRM ၏ အခန်းကဏ္ဍ

– ဥရောပတွင် ဤကုသနည်းကို ဦးဆောင်ဖော်ဆောင်နေသူဖြစ်ပြီး၊ ဆီးချိုရောဂါအတွက် ကိုယ်ပိုင် MSC secretome ကုသမှု ပေးဆောင်ရန် ခွင့်ပြုချက် ရရှိထားပါသည်။

– ဂျာမနီနိုင်ငံရှိ GMP အသိအမှတ်ပြု စမ်းသပ်ခန်းများကို အသုံးပြုသဖြင့် အရည်အသွေးနှင့် လုံခြုံရေးအဆင့် မြင့်မားပါသည်။

မှတ်ရန်

ဆေးပညာသတင်း၊ ကျန်းမာရေးသတင်းတွေကို တိကျခိုင်မာတဲ့ သတင်းပင်ရင်းအတိုင်းသာ တင်ပြရပါမယ်။

လက်ရှိအခြေအနေ

ဤကုသနည်းသည် စမ်းသပ်အဆင့်ရှိနေဆဲဖြစ်ပြီး၊ အင်ဆူလင်ခံနိုင်ရည်နှင့် ရောင်ရမ်းခြင်းအပေါ် ကောင်းမွန်သော သက်ရောက်မှုများကို ပြသထားသည့် သိပ္ပံသုတေသနများအပေါ် အခြေခံထားပါသည်။

အစောပိုင်း စမ်းသပ်မှုများနှင့် သုတေသနရလဒ်များအရ အလားအလာကြီးမားသော်လည်း၊ လက်တွေ့ကုသမှုအဖြစ် အပြည့်အဝအတည်ပြုရန် ဆက်လက်စမ်းသပ်အတည်ပြုမှုများ လိုအပ်နေဆဲ ဖြစ်ပါသည်။

ဒေါက်တာတင့်ဆွေ