The benefits of standing on one leg ခြေတဖက်တည်းဖြင့် မတ်တပ်ရပ်ခြင်း၏ အကျိုးကျေးဇူးများ

ခြေတဖက်တည်းဖြင့် မတ်တပ်ရပ်ခြင်းသည် ကျန်းမာရေးအတွက် အားကောင်းသော ညွှန်းကိန်းတခု ဖြစ်ရုံမျှမက ခန္ဓာကိုယ်ကို သန်မာစေခြင်း၊ ဦးနှောက်ကို ကာကွယ်ပေးခြင်းနှင့် ထိခိုက်ဒဏ်ရာရရှိနိုင်ခြေကို လျှော့ချပေးနိုင်သော ရိုးရှင်းသည့် လေ့ကျင့်ခန်းတခုလည်း ဖြစ်ပါသည်။

မိမိအားမသန်သော ခြေထောက်ဖြင့် ခြေတဖက်တည်း ရပ်တည်နိုင်သည့် အချိန်ကာလသည် အသက်အရွယ်ကြီးရင့်လာမှုကို အပြည့်ဝဆုံး ဖော်ပြပေးနိုင်သည့် ညွှန်းကိန်းများအနက် တခုဖြစ်ပြီး၊ ၎င်းသည် ခန္ဓာကိုယ် ကြွက်သားအင်အား သို့မဟုတ် လမ်းလျှောက်သည့် အရှိန်ထက်ပင် အချိန်နှင့်အမျှ ပိုမိုမြန်ဆန်စွာ ကျဆင်းသွားလေ့ရှိပါသည်။

ရုပ်ပိုင်းဆိုင်ရာ ကျန်းမာရေး အကျိုးကျေးဇူးများ

ခန္ဓာကိုယ်ပင်မ နှင့် အောက်ပိုင်းကြွက်သားများကို သန်မာစေခြင်း - 

ဟန်ချက်ထိန်းထားခြင်းက သင့်အား ဝမ်းဗိုက်ကြွက်သားများ၊ တင်ပါးကြွက်သားများ၊ ပေါင်ကြွက်သားများနှင့် သလုံးကြွက်သားများကို အားစိုက်ရစေပါသည်။ ၎င်းသည် ခြေကျင်းဝတ် ထိန်းအားစနစ်များနှင့် ခြေဖဝါး ခုံးအတွင်းရှိ ကြွက်သားငယ်များကို သန်မာစေသဖြင့် တင်ပါးဆုံ မညီမျှမှုများကို ပြုပြင်ပေးပြီး ကိုယ်အလေးချိန်ကို ညီညာစွာ ထိန်းထားနိုင်စေပါသည်။

ဟန်ပန်နှင့် ကိုယ်ဟန်အနေအထားကို တည့်မတ်စေခြင်း - 

ဟန်ချက်ညီစေရန်အတွက် သင့်ခန္ဓာကိုယ်က ကျောရိုးကို သဘာဝအတိုင်း တန်းစေ့ပေးပြီး ဝမ်းဗိုက်၊ တင်ပါးဆုံကွင်းနှင့် ကျောပြင်ကြွက်သားများကို လှုပ်ရှားစေပါသည်။ ဤသို့ တည်ဆောက်ပုံ အထောက်အကူပြုမှု တိုးတက်လာခြင်းက ကျောအောင့်ခြင်းကို သက်သာစေနိုင်ပါသည်။

အဆစ်များနှင့် အရိုးများကို ကာကွယ်ပေးခြင်း - 

ခြေတဖက်တည်း လေ့ကျင့်ခန်းကို ပုံမှန်ပြုလုပ်ပေးခြင်းက ဒူးကဲ့သို့သော အဆစ်များကို သက်ရောက်မှု လျှော့ချပေးပြီး ကာကွယ်ပေးပါသည်။ အသက် ၇၀ အထက် ပုဂ္ဂိုလ်များအတွက် ခြေတဖက်စီတွင် ၁ မိနစ်မျှ တနေ့ ၃ ကြိမ် ရပ်ပေးခြင်းသည် တင်ပါးဆုံအရိုး၏ သိပ်သည်းဆကို တိုးတက်စေပြီး အရိုးကျိုးနိုင်ခြေကို လျှော့ချပေးကြောင်း တွေ့ရှိရပါသည်။

နေ့စဉ် လှုပ်ရှားသွားလာမှုကို တိုးတက်စေခြင်း - 

သာမန် လမ်းလျှောက်ချိန်၏ ၄၀ ရာခိုင်နှုန်းခန့်သည် အမှန်တကယ်အားဖြင့် ခြေတဖက်တည်းဖြင့် ဟန်ချက်ထိန်းထားရသည့် အချိန်ဖြစ်ပါသည်။ ဤကျွမ်းကျင်မှုကို တိုးတက်စေခြင်းက လှေကားတက်ခြင်း သို့မဟုတ် မတော်တဆ ချော်လဲမလိုဖြစ်စဉ် ပြန်လည်ထိန်းယူခြင်းကဲ့သို့သော နေ့စဉ်လှုပ်ရှားမှုများကို ပိုမိုဘေးကင်း စိတ်ချစေပါသည်။

ဦးနှောက်နှင့် အာရုံကြောဆိုင်ရာ အကျိုးကျေးဇူးများ

ဦးနှောက်၏ ပြုပြင်ပြောင်းလဲနိုင်စွမ်း (Brain Plasticity) နှင့် အာရုံစိုက်မှုကို တိုးတက်စေခြင်း - 

ခြေတဖက်တည်းဖြင့် မတ်တပ်ရပ်နေခြင်းသည် ဦးနှောက်၊ အာရုံကြောစနစ်၊ မျက်စိ၊ နားတွင်းဟန်ချက် ထိန်းစနစ်နှင့် ကြွက်သားများအကြား ကြီးမားသော ဆက်သွယ်မှုကို လိုအပ်ပါသည်။ ဤစိတ်ပိုင်းဆိုင်ရာ အားထုတ်မှုက ဦးနှောက်၏ အာရုံကြောလမ်းကြောင်းသစ်များ ဖန်တီးနိုင်စွမ်း (Neuroplasticity) ကို လှုံ့ဆော်ပေးပြီး အာရုံစိုက်မှု၊ စည်းချက်ကျကျ ပေါင်းစပ်လှုပ်ရှားနိုင်မှုနှင့် နေရာအကွာအဝေး အာရုံခံနိုင်စွမ်းတို့ကို ထက်မြက်စေပါသည်။

ဉာဏ်ရည်ကြီးရင့် ကျဆင်းမှုကို ကာကွယ်ပေးခြင်း - 

ဟန်ချက်ထိန်း လေ့ကျင့်ခန်းသည် ဦးနှောက်ထုထည်နှင့် ပရိဖရွန်တယ် ကော်တက်စ် (Prefrontal Cortex) ၏ လှုပ်ရှားမှုကို ထိန်းသိမ်းပေးပါသည်။ 

ခြေတဖက်တည်းဖြင့် ၁၀ စက္ကန့်မှ စက္ကန့် ၂၀ အထိ မရပ်နိုင်ခြင်းသည် ဉာဏ်ရည်ချို့ယွင်းလာနိုင်ခြေ၊ ဦးနှောက်သွေးကြော ပျက်စီးနိုင်ခြေနှင့် သေဆုံးနိုင်ခြေ ပိုမိုမြင့်မားမှုတို့နှင့် ဆက်စပ်နေပါသည်။

ဘေးကင်းစွာ လေ့ကျင့်နည်းများ

ကျွမ်းကျင်သူများက နေ့စဉ် လှုပ်ရှားမှုများအကြား (ဥပမာ - သွားတိုက်နေစဉ်) မြန်မြန်ဆန်ဆန် ပြုလုပ်သည့် အလေ့အထဖြင့် ဟန်ချက်ထိန်းနည်းကို တိုးတက်အောင် လေ့ကျင့်ရန် အကြံပြုကြပါသည်။

သုံးပွိုင့်ဆုံ (Tripod) နည်းလမ်း - ခြေဗလာဖြင့် ရပ်ပြီး သင့်ခြေဖဝါးအောက်ရှိ နေရာ ၃ နေရာဖြစ်သော - ခြေမကြီး၏ အနောက်ဘက်၊ ခြေသန်း၏ အနောက်ဘက်နှင့် ခြေဖနောင့်၏ အလယ်ဗဟိုတို့တွင် ကိုယ်အလေးချိန်ကို ညီတူမျှတူ ခွဲဝေထားပါ။

စတင်လေ့ကျင့်သူများအတွက် - 

မျက်စိဖွင့်ထားပါ၊ အရှေ့တည့်တည့်ကို ကြည့်ပါ၊ ထောက်ကူရရန် နံရံ သို့မဟုတ် ခိုင်ခံ့သော ပရိဘောဂတခုခုပေါ်တွင် လက်ကို သာသာလေး တင်ထားပါ။ ခြေတဖက်စီတွင် စက္ကန့် ၁၀ မှ ၃၀ အထိ ရပ်တည်နိုင်ရန် ပန်းတိုင်ထားပါ။

ခက်ခဲအောင် လေ့ကျင့်ရန် - 

လက်နှစ်ဖက်ကို ခန္ဓာကိုယ်ဘေးတွင် ကပ်ထားပါ သို့မဟုတ် မျက်စိကို လုံးဝမှိတ်ထားပါ။ မျက်စိမှိတ်လိုက်ခြင်းက အမြင်အာရုံ အချက်ပြမှုများကို ဖယ်ရှားလိုက်သဖြင့် မတ်တပ်ရပ်နေနိုင်ရန်အတွက် ဦးနှောက်နှင့် အာရုံကြောစနစ်ကို ပိုမိုအားစိုက် ထိန်းချုပ်စေပါသည်။

Balancing on One Leg for 10 Seconds Predicts Longevity

ဒေါက်တာတင့်ဆွေ